«TRT Avaz» teleýaýlymynyň direktorynyň gatnaşmagynda okuw sapagy geçirildi
2025-nji ýylyň 13-nji oktýabrynda Türkmenistanyň Daşary işler ministrliginiň Halkara gatnaşyklary institutynda Türkiýe Respublikasynyň «TRT Avaz» teleýaýlymynyň direktory Ýüjel Kylyçkaýanyň gatnaşmagynda okuw sapagy geçirildi. Oňa ýurdumyzyň ýokary okuw mekdepleriniň, hususan-da, Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, şeýle hem Türkmenistanyň Daşary işler ministrliginiň Halkara gatnaşyklary institutynyň žurnalistika hünäri boýunça bilim alýan talyplary gatnaşdylar.
Mälim bolşy ýaly, Türkiýäniň Telewideniýe we radio guramasy (TRT) ençeme ýyllardan bäri ýurdumyz bilen işjeň hyzmatdaşlyk saklaýar. Bu guramanyň Aşgabatda wekilhanasy hem hereket edýär. Şunda «TRT Avaz», «TRT Haber», «TRT World» ýaly teleýaýlymlarda türkmen halkynyň medeniýetiniň, sungatynyň, beýik ösüşlerimiziň şöhlelenmegi dünýä jemgyýetçiliginiň ünsüni özüne çekýär. Şunuň bilen baglylykda, «TRT Avaz» teleýaýlymynyň direktory Türkiýäniň žurnalistikasynda dürli ugurlarda gazanan tejribeleri hem-de «TRT Avaz» teleýaýlymynyň alyp barýan işleri bilen tanyşdyrdy. Okuw sapagyna «TRT» teleradiokompaniýasynyň Türkmenistandaky wekili Ugur Sami Gezer hem gatnaşdy. Duşuşygyň dowamynda talyplar özlerini gyzyklandyrýan sowallar bilen ýüzlenip, žurnalistika boýunça bilimlerini baýlaşdyrdylar.
Türkiýeli žurnalistler türkmen diplomatiýasynyň milli mekdebi bilen hem ýakyndan tanyşdylar. Bu abraýly bilim ojagyndaky «Ýaş žurnalistler» ylmy-döredijilik gurnagynyň çägindäki okuw studiýasy, «Ýaş diplomatyň sesi» atly elektron gazetiniň redaksiýasy bilen tanyşlyk myhmanlarda uly gyzyklanma döretdi. Olar ýokary myhmansöýerlik bilen garşylanandyklary, meýilleşdirilen çäreleriň ýokary guramaçylyk derejesiniň üpjün edilendigi üçin Gahryman Arkadagymyza hem-de Arkadagly Gahryman Serdarymyza bimöçber hoşallygyny beýan etdiler.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.