TESOL 2025: TEHNOLOGIÝA, OKUW WE ÖZGERTME
2025-nji ýylyň 19–21-nji awgusty aralygynda Halkara ynsanperwer ylymlary we ösüş uniwersitetinde «TESOL 2025: Tehnologiýa, okuw we özgertme» atly okuw maslahaty üstünlikli geçirildi.
Bu okuw maslahaty mugallymlara öňdebaryjy başarnyklary görkezmek, täze usullar we bilim tehnologiýalaryndaky tendensiýalar bilen tanyş etmek, şeýle-de iňlis dili sapaklarynda emeli aňdan netijeli peýdalanmagyň mümkinçiliklerini ara alyp maslahatlaşmak maksady bilen Amerikanyň Birleşen Ştatlarynyň Türkmenistandaky Ilçihanasy bilen Türkmenistanyň Bilim ministrligi tarapyndan bilelikde gurnaldy. Okuw maslahatyna Türkmenistanyň ýokary okuw mekdeplerinden, bilim merkezlerinden, orta mekdeplerden hem-de Türkmenistanyň Daşary işler ministrliginiň Halkara gatnaşyklary institutyndan mugallymlar gatnaşdylar.
Üç günüň dowamynda oňa gatnaşyjylar ABŞ-dan gelen doktor Bet Klark-Gareka, doktor Manuel Gomes Portilýo we Liza Mann ýaly halkara derejesinde ykrar edilen hünärmenleriñ we ýerli bilermenleriň çykyşlaryny diňlediler. Olar tehnologiýalaryň ulanylyşy, interaktiw usullar we okuw maksatnamalarynyň düzülmegi bilen baglanyşykly tejribelerini paýlaşdylar.
Bu maslahat ählumumy sanlylaşdyrmanyň örän wajyp döwründe täze tehnologiýalaryň okuw işlerine ornaşdyrylmagyna giň ýol açýar. Munuň özi diňe bir mugallymlaryň hünär derejesiniň ýokarlanmagyna däl, eýsem geljekki nesiller üçin bilimiň hiliniň ýokarlanmagyna, dünýä bileleşigine üstünlikli goşulmagyna taýýarlanmagyna goşant goşýar.
Wepa ÇARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Dünýä dilleri kafedrasynyň mugallymy.