«Tegelek stol» maslahaty
2021-nji ýylyň 27-nji ýanwarynda Türkmenistanyň Daşary işler ministrliginiň Halkara gatnaşyklary instituty bilen Türkmenistanyň Prezidentiniň ýanyndaky Döwlet gullugy akademiýasynyň arasynda «2021-nji ýyl – Halkara parahatçylyk we ynanyşmak ýyly» atly onlaýn görnüşinde «tegelek stol» maslahaty geçirildi. Bu onlaýn maslahatyna Türkmenistanyň Prezidentiniň ýanyndaky Döwlet gullugy akademiýasynyň ýolbaşçylary we professor-mugallymlary, şeýle hem Türkmenistanyň Daşary işler ministrliginiň Halkara gatnaşyklary institutynyň professor – mugallymlary gatnaşdylar.
Onlaýn maslahat Türkmenistanyň Prezidentiniň ýanyndaky Döwlet gullugy akademiýasynyň rektory A. Annamyradowyň giriş sözi bilen başlady. Onlaýn maslahatynyň dowamynda Türkmenistanyň Prezidentiniň ýanyndaky Döwlet gullugy akademiýasynyň prorektory Kakageldi Hümmäýew, mugallymlary Oguljeren Hudaýberdiýewa, Akgül Durdyýewa, Jemile Hommaýewa, Ilmät Hanmedow, akademiýanyň diňleýjisi Şatlyk Muhammetgulyýew hem-de Türkmenistanyň Daşary işler ministrliginiň Halkara gatnaşyklary institutynyň Jemgyýeti öwreniş ylymlary kafedrasynyň uly mugallymlary, filosofiýa ylymlarynyň kandidaty Ogulgurban Ezimowa we Täçnabat Paýtykowa çykyş etdiler.
«Tegelek stol» duşuşygynda çykyş edenler Bitarap Türkmenistanyň alyp barýan dostlukly, parahatçylykly gatnaşyklary, ýola goýulýan ylym-bilim, medeniýet ýaly ugurlarda özara bähbitli ikitaraplaýyn we köptaraplaýyn hyzmatdaşlygy, öňden gelýän tejribelere esaslanyp täze hil derejä çykarmakda diplomatiýanyň esasy wezipeleri dogrusynda pikir alyşyldy.
Onlaýn maslahatynyň ahyrynda oňa gatnaşyjylar hormatly Prezidentimiziň janynyň sag, başynyň dik, Garaşsyz, hemişelik Bitarap döwletimizi mundan beýläk-de ösdürmek babatda alyp barýan ähli tutumlarynyň rowaç bolmagyny arzuw etdiler.
Gurbanjemal Egirjäýewa,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.