Täze okuw ýylynyň ilkinji güni
Bu gün 1-nji sentýabr. Bilimler we talyp ýaşlar güni. Bu ajaýyp gün mynasybetli ýurdumyzyň dürli künjeklerinde geçirilýän baýramçylyk dabaralary Türkmenistanyň Daşary işler ministrliginiň Halkara gatnaşyklary institutynda hem aýratyn öwüşgine eýe boldy.
Baýramçylyk dabarasynda, ilki bilen, Türkmenistanyň Döwlet Senasy ýaňlandy. Dabaranyň başynda Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredowyň hormatly Prezidentimiziň ýurdumyzyň mekdep okuwçylaryna, talyp ýaşlaryna, mugallymlaryna we bilim işgärlerine Bilimler we talyp ýaşlar güni mynasybetli iberen Gutlagyny okamagy dabaranyň täsirini has-da artdyrdy.
Institutyň rektory Jumamyrat Gurbangeldiýew, Halkara gatnaşyklary we diplomatiýa kafedrasynyň müdiri, Türkmenistanyň Adatdan daşary we Doly ygtyýarly ilçisi, taryh ylymlarynyň doktory, professor Amangeldi Rahmanow dagy gutlag sözi bilen çykyş etdiler. Olar öz gezeginde, talyp ýaşlary täze okuw ýylynyň başlanmagy hem-de Bilimler we talyp ýaşlar güni mynasybetli gutladylar.
Instituta ilkinji gezek gadam basan talyplaryň ýerine ýetiren edebi-sazly kompoziýasiýasy hem-de parahatçylygyň simwoly hökmünde ak kepderileriň uçurylmagy, dürli dillerde beýan edilen ýürek buýsançlary baýramçylyk dabarasynyň şowhunyny has-da artdyrdy.
Ýaş diplomatlaryň mekdebi tarapyndan guralan «Parahatçylygyň ýaş çaparlary» atly akyl-paýhas bäsleşiginiň, döwlet we halkara ders bäsleşikleriniň ýeňijileriniň sekiz burçda öňe saýlanyp durmagy dabara ýakymly öwüşgin çaýdy.
Şu ajaýyp pursatlardan soň, täze okuw ýylynyň ilkinji jaňy kakyldy. Talyplar ilkinji okuw ýylynyň ilkinji gününde «Halkyň Arkadagly zamanasy» atly ilkinji okuw sapagyna gatnaşdylar.
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.