TÄSIRLI GEÇEN GEZELENÇ
2024-nji ýylyň 13-nji sentýabrynda Türkmenistanyň Daşary işler ministrliginiň Halkara gatnaşyklary institutynyň talyp gyzlarynyň gatnaşmagynda Türkmen halysynyň milli muzeýine gezelenç guraldy.
Gezelenjiň dowamynda Türkmen halysynyň milli muzeýiniň hünärmenleri talyp ýaşlary ilki bilen muzeýiň içi bilen tanyşdyryp, onuň 2009-njy ýylda açylyp, halkyň hyzmatyna berlen bu ajaýyp binanyň häzirki wagtda diňe bir paýtagtyñ ýaşaýjylarynyň däl, eýsem, Aşgabadyň gözelligine aşyk bolup, dünýäniň çar künjeginden onuň ajaýyp keşbini synlamaga gelýän jahankeşdeleriň hem iň bir gelim-gidimli ýerine öwrülendigini, şeýle-de türkmen halkynyñ milli ruhy siňen nepis halylaryň naýbaşylarynyň jemlenen ýeri bolan bu muzeýde dürli ýyllarda döredilen iki ýüzli halylaryň, nepis sungatyň taryhynda dokalan iň uly halylaryň saklanýandygyny belläp geçdiler.
Türkmen durmuşynyň aýrylmaz bölegine öwrülen halylar tutuş adamzadyň medeni hazynasyna ägirt uly goşant goşan halkymyzyň gadymy sungatynyň ajaýyp ýadygärligidir. Türkmen milli halyçylyk sungatynyň ÝUNESKO-nyň adamzadyň maddy däl medeni gymmatlygynyň sanawyna girizilmegi munuň aýdyň beýanydyr.
Şeýle gezelençleriň yzygiderli guralmagy türkmen diplomatiýasynyň geljekki wekilleri bolan talyp ýaşlaryň ukyp-başarnyklarynyň açylmagyna ýetirýän täsiriniň uludygyny aýdyp bu gezelenje gatnaşanlar özleriniň hoşallygyny bildirdiler.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.