TARYHY MUZEÝE GEZELENÇ
2024-nji ýylyň 3-nji aprelinde Türkmenistanyň Daşary işler ministrliginiň Halkara gatnaşyklary institutynyň mugallymlarynyň hem-de talyp ýaşlarynyň gatnaşmagynda Aşgabadyň gündogarynda ýerleşýän — Änew şäheriniň Ak bugdaý etrabynyň taryhy muzeýine gezelenç guraldy. Bu gezelenç Änew şäheriniň «Türki dünýäsiniň medeni paýtagty» diýlip yglan edilen ýylynda türkmen medeniýetini we taryhyny içgin öwrenmekde aýratyn ähmiýete eýedir.
Gadymy Änew adamzat taryhyndaky möhüm merkezleriň biridir. Änew şäheri diňe taryhy bilen däl, eýsem, şu günki ajaýyplygy we uzak geljege gönügen ösüşli beýik maksatlary bilenem dünýäniň ünsüni özüne çekýär. Gezelenjiň dowamynda hünärmenleriň ýadygärlikler toplumynyň taryhy, medeni goraghananyň çäklerinde arheologlar tarapyndan üsti açylan tapyndylar hem-de olaryň bu muzeýde ýerleşdirilmegi barada beren gyzykly gürrüňleri ýaşlaryň maglumat goruny örän baýlaşdyrdy.
Bu ýerde talyplar ýurdumyzyň çäginden tapylan ilkinji bugdaý dänejiklerini, keramiki toýundan ýasalan önümleri, agaçdan we misden ýasalan dürli görnüşli gap-gaçlary we beýleki dürli taryhy tapyndylary synladylar. Milli «Ak bugdaý» muzeýine edilen gezelenç ýatda galyjy pursatlara baý boldy.
Hydyr ERSARYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.