Talyplaryň täsirli geçen gyşky dynç alyş möwsümi
2022-nji ýylyň 5-nji fewralynda Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda talyplaryň gyşky dynç alyş möwsümini gyzykly, täsirli we netijeli geçirmeklerini üpjün etmek maksady bilen medeni çäre guraldy. Bu medeni çärede Türkmenistanyň Beýik Saparmyrat Türkmenbaşy adyndaky Baş drama teatrynyň sahna ussatlary ýokary okuw mekdebimizde myhmançylykda bolup, özleriniň taýýarlan sahna eserleri, aýdym-sazlary bilen çykyş etdiler.
Ýurdumyzyň meşhur artistleriniň ussatlyk bilen ýerine ýetiren sahna eserleri, ýokary ruhubelentlige beslenen, şirin labyzly aýdym-sazlary talyp tomaşaçylarda uly täsir galdyrdy. Mundan başga-da, görkezilen sahna eserleri, ýerine ýetirilen aýdym-sazlar uly terbiýeçilik ähmiýete eýe bolup, Berkarar döwletimiziň bagtyýarlyk döwrüniň döredijilik ruhuny çeper şöhlelendirdi. Ýokary okuw mekdebimiz tarapyndan guralýan şeýle medeni-köpçülikleýin çäreler, talyp ýaşlaryň gyşky dynç alyş möwsümini manyly we gyzykly geçirmeklerine ýardam edýär. Talyplarymyz üçin geçirilýän şeýle çäreler olaryň boş wagtlaryny netijeli geçirmekleri bilen bir hatarda, dünýägaraýyşlaryny giňeltmekleri, medeniýetli dynç almaklary üçin döredilýän oňaýly şertleriň biri bolup durýar. Bular ýaly medeni-döredijilik çäreleri talyplara okuw ýylynyň ikinji ýarymýyllygyny üstünlikli geçirmäge ýardam berýär hem-de olary täze döredijilik gözleglerine höwes döredýär.
Humaý MEREDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.