Talyplarymyz Ýaşlar baýragynyň eýeleri
2025-nji ýylyň 16-njy noýabrynda paýtagtymyzdaky Türkmenistanyň Jemgyýetçilik guramalarynyň merkezinde Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan yglan edilen “Türkmenistanyň Ýaşlar baýragynyň eýesi” diýen hormatly ada mynasyp bolan ýaşlary sylaglamak dabarasy geçirildi.
Ýokary zähmet üstünliklerine eýe bolýan diýarymyzda Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynda ösüp gelýän ýaş nesli ýokary watansöýüjilikli ruhda terbiýelemek, olaryň ýurdumyzyň ykdysady ösüşine özleriniň saldamly goşandyny goşmak we ýaşlary pederlerimize laýyk terbiýeläp ýetişdirmek ugrunda hem birnäçe işler alnyp barylýar, ýaşlar üçin giň mümkinçilikler döredilýär. Ýaşlar şeýle döredilýän mümkinçiliklerden ýokary derejede peýdalanýarlar we olar häzirki wagtda döredijilikli zähmet çekýärler. Kämil tehnologiýalar ornaşdyrylan orta, ýörite orta we ýokary okuw mekdeplerinde bilim alýan ýaşlar ylmy-barlag we döredijilik işlerine işeňňir gatnaşýarlar. Şeýle hem olar milli we halkara derejesinde geçirilýän dürli görnüşli bäsleşiklerde çykyş edip, ýurdumyzyň halkara derejesindäki abraýyny has-da belende galdyrýarlar.
Ýurdumyzda her bir ynsanyň çekýän asylly zähmetine ýokary baha berilýär. Magtymguly adyndaky Ýaşlar guramasynyň döredilen güni mynasybetli bu guramanyň Merkezi geňeşiniň yglan etmeginde her ýylda ýokary derejede geçirilýän ýurdumyzyň zähmetde we döredijilikde aýratyn tapawutlanan ýaşlarynyň ençemesine Türkmenistanyň Ýaşlar baýragy dabaraly ýagdaýda gowşurylmagy munuň aýdyň subutnamasydyr.
Halkara parahatçylyk we ynanyşmak ýylynda bu abraýly baýraga Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň talyplary Aýnur Hudaýbergenowa we Aýşirin Döwletowa, Halkara gatnaşyklary fakultetiniň talyplary Hojamyrat Baýlyýew, Taňryguly Geldimämmedow, Şyhdurdy Şyhyýew dagylar mynasyp boldular. Türkmenistanyň Ýaşlar baýragyna eýe bolan ruhubelent ýaşlaryň her biriniň ýürek senasynda Watana bolan uly söýgi bar. Olar Gahryman Arkadagymyza, Arkadagly Gahryman Serdarymyza kalplarynyň töründen çykýan çäksiz alkyş sözlerini aýdýarlar.
Maýsa AŞYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.