TALYPLARYMYZ HALKARA INTERNET OLIMPIADASYNYŇ ÝEŇIJILERI
2025-nji ýylyň 7-nji noýabrynda S.A.Nyýazow adyndaky Türkmen oba hojalyk uniwersitetinde ýurdumyzyň we daşary ýurtlaryň ýokary okuw mekdepleriniň talyplarynyň arasynda IV açyk halkara internet ekologiýa olimpiadasy geçirildi. Oňa ýurdumyzyň ýokary okuw mekdepleriniň, şol sanda Türkmenistanyň Daşary işler ministrliginiň Halkara gatnaşyklary institutynyň talyp ýaşlary hem gatnaşdylar.
IV açyk halkara internet ekologiýa olimpiadasynda populýasiýalaryň ekologiýasy we biosferasy; adam ekologiýasy we häzirki zaman ekologiýa meseleleri; senagat ekologiýasy; ekologik monitoring; ekologiýa kanunçylygy we halkara guramalar bilen baglanyşykly ýumuşlar hödürlendi. Olimpiada gatnaşan talyplaryň işleri programma üpjünçiligi arkaly bahalandyryldy we toplanan ballaryň netijeleri boýunça jemi jemlendi.
Bäsleşigiň netijeleri boýunça Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary fakultetiniň III ýyl talyby Sahydöwlet Hümmetjumaýew I orna, Halkara ykdysady gatnaşyklary fakultetiniň III ýyl talyplary Dawut Gezerow we Aýmyrat Muhamow II orna, şeýle-de şol fakultetiň III ýyl talyby Şanazar Öwliýagulyýew III orna mynasyp boldular.
Bäsleşik ýurdumyzyň ekologiýa syýasatyny ýaş nesilleriň arasynda giňden wagyz etmekde, olaryň ekologik bilimlerini we endiklerini kämilleşdirmekde, geljekki halkaraçy hünärmenleriň dünýägaraýşyny ösdürmekde möhüm ähmiýete eýedir.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara
ykdysady gatnaşyklary kafedrasynyň mugallymy.