«Talyp joşguny – 2022» döredijilik festiwalynyň döwlet tapgyry geçirildi
2022-nji ýylyň 7-nji iýunynda Ýagşygeldi Kakaýew adyndaky Halkara nebit we gaz uniwersitetinde Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de Türkmenistanyň Bilim ministrliginiň bilelikde gurnamagynda “Halkyň Arkadagly zamanasy” ýylynyň joşgunly owazyny wasp etmek, halkymyzyň milli medeniýetiniň many-mazmunyny ýaş nesle öwretmek, türkmen medeniýetini dünýä ýaýmak, talyp ýaşlaryň aýdym-saz we tans sungatynda, halk döredijiliginde zehin-başarnyklaryny açyp görkezmek maksady bilen, ýurdumyzyň ýokary okuw mekdepleriniň çeper höwesjeň talyp ýaşlarynyň arasynda «Talyp joşguny – 2022» atly döredijilik festiwalynyň döwlet tapgyry dabaraly ýagdaýda geçirildi. Döredijilik festiwalyna ýurdumyzyň ýokary okuw mekdepleriniň bagtyýar talyplary gatnaşdylar.
«Talyp joşguny – 2022» atly döredijilik festiwalynyň döwlet tapgyrynda bagtyýar zamanamyzy wasp edýän aýdym-sazly çykyşlara giň orun berildi. Dabaranyň dowamynda Gahryman Arkadagymyzyň jöwher paýhasyndan dörän «Türkmenistan Beýik Ýüpek ýolunyň ýüregi» atly eseriniň esasynda taryhy sahna janlandyryldy. Bu festiwalyň dowamynda talyp ýaşlaryň ýerine ýetirmegindäki milli tanslar, edebi sazly kompozisiýa, taryhda uly yz goýan şahsyýetlerimiz barada taryhy sahna, çeper okaýyş we şatlyk-şowhuna beslenen aýdym-sazly çykyşlar dabara gatnaşyjylarda uly täsir galdyrdy.
Senemgül ALLAKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.