«TALYP GÖZELI – 2026» ATLY GÖZELLIK BÄSLEŞIGINIŇ JEMLEÝJI TAPGYRY GEÇIRILDI
2026-njy ýylyň 4-nji martynda Türkmenistanyň Magtymguly adyndaky Ýaşlar guramasynyň Merkezi Geňeşi, Türkmenistanyň Bilim ministrligi hem-de Türkmenistanyň Zenanlar birleşiginiň Merkezi Geňeşi bilen bilelikde Halkara zenanlar güni mynasybetli Berkarar döwletiň täze eýýamynyň Galkynyşy döwrüniň talyp gyzlarynyň iş başarjaňlygyny, ugurtapyjylygyny, ruhubelentligini, buýsançlylygyny, keşp hem-de edep gözelligini, halkymyzyň milli däp-dessurlaryny bilşini, durmuşa taýýarlygyny, medeniýetini, edep-ekramlylygyny açyp görkezmek maksady bilen ýurdumyzyň ýokary okuw mekdepleriniň talyp gyzlarynyň arasynda «Talyp gözeli – 2026» atly gözellik bäsleşigini geçirdi.
Bäsleşigiň birinji şertinde bäsleşige gatnaşýan talyp gözellerimiz Berkarar döwletiň täze eýýamynyň Galkynyşy döwrüniň 2026-njy «Garaşsyz baky Bitarap Türkmenistan – bedew batly at-myradyň mekany» ýylyny dabaralandyrmak ýurdumyzda türkmen gelin-gyzlaryna goýulýan sarpany, şeýle hem özleriniň sungata, döredijilige bolan ukybyny, ussatlyklaryny aýdym, goşgy, sahna çykyşlaryny ýerine ýetirmek bilen açyp görkezdiler. Ikinji şertinde bäsleşige gatnaşýan talyp gözellerimiz Gahryman Arkadagymyzyň «Bereketli türkmen saçagy» atly kitabyndan ugur alyp, türkmen milli tagamy bolan unaş kesdiler. Soňra bäsleşigiň «Hünärim bar, hormatym bar» atly üçünji şertinde talyp gyzlarymyz özleriniň zehinini, ussatlygyny we ukybyny keşde çekmek arkaly açyp görkezdiler.
Bäsleşigiň soňunda emin agzalary bäsleşige gatnaşan talyp gyzlara adalatly baha berip, bäsleşigiň ýeňijilerini yglan etdiler. Soňra halkymyzyň asuda, abadan we bagtyýar durmuşda ýaşamagy hem-de mynasyp zähmet çekmegi ugrunda bimöçber aladalar edýän Gahryman Arkadagymyzyň hem-de Arkadagly Gahryman Serdarymyzyň janlarynyň sag, ömürleriniň uzak, tutýan tutumly işleriniň mundan beýläkde rowaçlyklara beslenmegini tüýs ýürekden arzuw etdiler.
Muhammet SÜLEÝMANOW,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary kafedrasynyň mugallymy,
institutyň Ilkinji Ýaşlar guramasynyň başlygy.