Talyp deň-duşumyzyň üstünligi
Berkarar döwletiň täze eýýamynyň galkynyşy döwründe Arkadag Serdarly bagtyýar ýaşlar ýylynda Türkmenistanyň Gyzyl Ýarymaý Milli Jemgyýeti, Ýewropa bileleşiginiň hem-de “Ýaş tebigatçy” jemgyýetçilik guramasynyň bilelikde gurnamagynda ‘’Tygşytlanan bir damja suw merhemet bilen gaýdyp geler’’atly surat basleşiginde ýaş raýatlarymyz owadan tebigatymyzy gorap saklamaklygyň, suwyň gymmatly baýlykdygyny ony tygşytly ulanmalydygymyzyň möhümdigini öz çeken suratlary bilen wasp etdiler.
Bu bäsleşik her ýylyň 22-nji martynda bellenilýän Bütindünýä suw gününe gabat gelýär.
Döredijilik bäsleşigine gatnaşmaga 7 ýaşdan 22 ýaşa çenli bolan çagalar we ýaşlar çagyryldy. Olar stoluň üstünde goýulýan senenamalarda, kitaplaryň belliklerinde, şeýle hem suraty boýamaly kitaplary döretmekde peýdalanyljak suratlary çekmekde bäsleşdiler.
Suratlaryň, galamlaryň ýa-da reňkleriň üsti bilen çekilen asyl nusgasy, şeýle hem ýokary hilde skanirlenen elektron nusgalary hem kabul edildi.
Bäsleşigiň netijeleri boýunça Türkmenistanyň Daşary işler ministrliginiň Halkara gatnaşyklary institutynyň I ýyl talyby Guwanjowa Durdynyýaz I orny eýelemegi başardy. Ýeňiş gazanan hem-de işjeň gatnaşan ýaşlara Hormat hatlary we ýadygärlik sowgatlar gowşuryldy.
Ogulşat GARYYÝEWA,
Türkmenistanyň Daşary isler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.