Talyplarymyzyň sport üstünligi
2026-njy ýylyň 20-nji fewralynda paýtagtymyzda geçirilen karatedo boýunça Aşgabat şäheriniň açyk çempionaty gyzykly pursatlara baý boldy. Ýaryşyň dowamynda aýratyn tapawutlanan türgenleriň biri hem Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 1-nji ýyl talyby Magtymguly Annaýewdir. Ol 18 ýaş we uly oglanlaryň arasynda, 60 kg agram derejesinde karatedonyň iň dinamiki ugry bolan Kumite boýunça çykyş edip, III orny eýeledi. Şeýle hem, Kata görnüşi boýunça Halkara ykdysady gatnaşyklary fakultetiniň 3-nji ýyl talyby Resul Atajanow çykyş edip, I orna eýe boldy.
Geljekki diplomatlarymyzyň halkara sport meýdançalarynda-da ýurdumyzyň baýdagyny belentde parlatmaga ukyplydygyny görkezýän bu ýeňiş, talyplaryň arasynda uly ruhubelentlik döretdi.
Selbi BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.