SUW DIPLOMATIÝASYNA BAGYŞLANAN OKUW SAPAGY
2022-nji ýylyň 24-nji dekabrynda Türkmenistanyň Daşary işler ministrliginiň Halkara gatnaşyklary institutynda döredilen Türkmenistanyň diplomatiýasynyň möhüm ugurlary boýunça okuw merkezinde “Suw diplomatiýasy” ugry boýunça Türkmenistanyň Beýik Britaniýanyň we Demirgazyk Irlandiýanyň Birleşen Patyşalygyndaky Adatdan Daşary we Doly ygtyýarly ilçisi Ýazmyrat Nurniýazowiç Serýaýewiň, şeýle-de institutyň talyplarynyň gatnaşmagynda okuw sapagy geçirildi. Ol Türkmenistan bilen Beýik Britaniýanyň we Demirgazyk Irlandiýanyň Birleşen Patyşalygynyň arasyndaky ekologiýa çygrynda BMG-niň ýöriteleşdirilen edaralary we düzümleri dogrusynda alnyp barylýan işlere bagyşlandy.
Ilçi ekologiýa howpsuzlygyny üpjün etmegiň Türkmenistanyň döwlet syýasatynyň ileri tutulýan ugurlarynyň biri bolup durýandygyny belledi. Ol şeýle-de ýurdumyzyň BMG-niň çäklerinde oňyn hyzmatdaşlygy giňeltmek ugrunda çykyş edýändigini, BMG-niň ekologiýanyň howpsuzlygyna degişli meseleleri boýunça birnäçe Konwensiýalaryna gatnaşýandygyny, bu babatda işjeň orny eýeleýändigini delilli maglumatlaryň üsti bilen beýan etdi.
Okuw sapagynyň dowamynda suw-ekologiýa meseleleri çözülende halkara hukugynyň umumy ykrar edilen kadalaryna daýanyp, sebitiň ähli ýurtlarynyň bähbitleriniň nazara alynmalydygy hem-de abraýly halkara guramalaryna, ilkinji nobatda, Birleşen Milletler Guramasy bilen işjeň gatnaşykda bolmagyň zerurlygy aýratyn bellenilip geçildi.
Geçirilen bu okuw sapagy talyplar üçin örän täsirli bolup, olar özlerini gyzyklandyrýan sowallara giňişleýin jogap aldylar, şeýle-de bilimlerini has-da kämilleşdirdiler.
Mähri BAÝRAMOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
Syýasy kommunikasiýa we internet
žurnalistikasy
hünäriniň II ýyl talyby.