«SIZ FRANSIÝA BARADA NÄME BILÝÄRSIŇIZ?» ATLY DIL HEPDELIGI TÄZE ZEHINLERI ÝÜZE ÇYKARDY
Türkmenistanyň we Fransiýa Respublikasynyň arasynda diplomatik gatnaşyklaryň ýola goýulmagynyň 34 ýyllygy hem-de Fransuz diliniň halkara güni mynasybetli Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasy 2026-njy ýylyň 13 – 19-njy marty aralygynda «Siz Fransiýa barada näme bilýärsiňiz?» («Que connaissez-vous de la France?») atly dil hepdeligini geçirdi. Hepdelige institutyň fransuz dilini öwrenýän 3-nji we 4-nji ýyl talyplary işjeň gatnaşdylar.
2026-njy ýylyň «Garaşsyz, baky Bitarap Türkmenistan – bedew batly at-myradyň mekany» şygaryny wagyz etmek hem-de BMG-niň Durnukly ösüş maksatlaryny amala aşyrmak hepdeligiň esasy ugry boldy. Çäräniň esasy wezipeleri talyplaryň fransuz dili boýunça bilimlerini çuňlaşdyrmakdan, zehinli ýaşlary ýüze çykarmakdan we olary ylmy-barlag işlerine höweslendirmekden ybarat boldy.
16-njy martda geçirilen saýlama tapgyrda talyplar diwar gazetlerini taýýarlamak boýunça bäsleşdiler. Bu ugra ähli fakultetleriň talyp toparlary özleriniň döredijilikli işleri bilen gatnaşdylar. Emin agzalarynyň baha bermegine görä, Halkara žurnalistikasy fakultetiniň talyplary birinji orny eýelemegi başardylar.
Bäsleşigiň dowamynda talyplar diňe bir döredijilik ukyplaryny däl, eýsem dil baýlyklaryny hem görkezdiler. Hususan-da, olar fransuz dilindäki anagrammalardan täze sözleri tapmak we berlen çylşyrymly tekstleriň grammatik hem-de stilistik ýalňyşlaryny düzetmek boýunça ýörite ýumuşlary ýokary derejede ýerine ýetirdiler.
Çeper okaýyş bäsleşiginde talyplar Magtymguly Pyragynyň fransuz diline terjime edilen goşgularyny, Wiktor Gýugo, Pol Elýuar we Žan de Lafonten ýaly meşhur fransuz edebiýatynyň wekilleriniň eserlerini uly ussatlyk bilen okadylar. Şeýle hem, Gahryman Arkadagymyzyň fransuz diline terjime edilen «Ahalteke bedewi – biziň buýsanjymyz we şöhratymyz» («L’Akhal-Téké – gloire et fierté du Turkménistan») atly kitabyndan parçalaryň okalmagy bäsleşigiň ähmiýetini has-da artdyrdy.
19-njy martda geçirilen jemleýji tapgyr Halkara ykdysady gatnaşyklary fakultetiniň talyby Mähri Guzyçyýewanyň ýerine ýetirmeginde «La Seine» aýdymy bilen dabaralandy. Şeýle-de talyplar «Türkmen-fransuz gatnaşyklary», «Halkara Frankofoniýa guramasy» we «Görnükli fransuz şahsyýetleri» temalary boýunça prezentasiýalar bilen çykyş etdiler.
Zehin bäsleşigine hödürlenen soraglar Fransiýanyň taryhy, medeniýeti, fransuz dili we edebiýaty hem-de häzirki zaman türkmen-fransuz hyzmatdaşlygy ýaly mowzuklary öz içine aldy.
Zehin bäsleşiginiň netijesinde eminler topary ýeňijileri kesgitledi:
I orun: Sona Gurbanowa, Halkara hukugy fakultetiniň 3-nji ýyl talyby;
II orun: Nurbibi Guljanowa, Halkara gatnaşyklary fakultetiniň 3-nji ýyl talyby;
III orun: Orazmyrat Sähetmyradow, Halkara ykdysady gatnaşyklary fakultetiniň 4-nji ýyl talyby.
Kafedranyň «Lingvo World» ylmy gurnagy tarapyndan guralan bu hepdelik institutyň talyp ýaşlarynyň fransuz dilini çuňňur öwrenmäge we halkara medeni dialogy ösdürmäge bolan gyzyklanmasynyň artýandygyny ýene bir gezek subut etdi.
Ogulbeg GAZAKOWA,
Türkmenistanyň Daşary işler ministrliginiň
Halkara gatnaşyklary institutynyň
Dünýä
dilleri kafedrasynyň fransuz dili mugallymy.