SEMINAR GEÇIRILDI
2024-nji ýylyň 7-nji martynda Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň 3-nji Antalýa diplomatiýa forumyndaky taryhy çykyşynyň ähmiýeti barada seminar geçirildi. Bu duşuşyga Türkmenistanyň Daşary işler ministrliginiň Halkara ykdysady hyzmatdaşlyk bölüminiň başlygy, Türkmenistanyň Adatdan daşary we Doly ygtyýarly Ilçisi, Atageldi Haljanow hem-de institutyň talyplary gatnaşdylar.
Seminarda tejribeli diplomat Atageldi Haljanow häzirki wagtda Türkmenistan Hazar we Gara deňizleriniň üstünden geçýän, Ýewropa, Ýakyn Gündogar, Aziýa ‒ Ýuwaş umman sebitlerini bir bitewi ulag ulgamyna birleşdirýän Ýewraziýa multimodal üstaşyr ulag taslamalaryny durmuşa geçirmegiň ähmiýeti barada gürrüň berdi. Soňra tejribeli diplomat inklýuziw ulag ulgamyny kemala getirmekde Bütindünýä Söwda Guramasynyň, Bütindünýä bankynyň, Halkara pul gaznasynyň, Yslam ösüş bankynyň, Aziýanyň ösüş bankynyň, Ýewropanyň täzeleniş we ösüş bankynyň halkara ulag taslamalaryny amala aşyrmakdaky ähmiýeti barada gürrüň berdi.
Seminaryň dowamynda talyplar özlerini gyzyklandyrýan birnäçe sowallar bilen ýüzlenip, duşuşygyň has-da täsirli geçmegine goşant goşdular.
Myrat MAKSADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
I ýyl talyby.