«BERKARAR DÖWLETIŇ TÄZE EÝÝAMYNYŇ GALKYNYŞY DÖWRÜNDE YLYM, TEHNIKA WE INNOWASION TEHNOLOGIÝALAR» ATLY HALKARA YLMY MASLAHAT GEÇIRILDI
2024-nji ýylyň 12-nji iýunynda Türkmenistanyň Oguz han adyndaky Inžener-tehnologiýalar uniwersitetinde Ylymlar güni mynasybetli «Berkarar döwletiň täze eýýamynyň Galkynyşy döwründe ylym, tehnika we innowasion tehnologiýalar» atly halkara ylmy maslahat geçirildi. Maslahata daşary ýurtlaryň, ýurdumyzyň ýokary okuw mekdepleriniň professor-mugallymlary, talyp ýaşlary bilen birlik-de Türkmenistanyň Daşary işler ministrliginiň Halkara gatnaşyklary institutynyň mugallymlary hem sanly ulgam arkaly gatnaşdylar.
Maslahatyň umumy mejlisinde çykyş edenler hormatly Prezidentimiziň parasatly baştutanlygynda ýurdumyzyň halkara abraýynyň barha ýokarlanýandygyny, döwletimizde ýaşlara ylym bilen meşgullanmak üçin giň mümkinçilikleriň döredilýändigini buýsanç bilen belläp geçdiler. Çykyşlarda Türkmenistanyň halkara arenada öňe sürýän düýpli ylmy seljermelere esaslanýan teklipleriniň hem-de başlangyçlarynyň dünýä döwletleri tarapyndan gyzgyn goldanylýandygy aýdylyp geçildi. Şeýle hem, maslahata gatnaşyjylar ýurdumyzda ýaşlar üçin uly işleri durmuşa geçirýän türkmen halkynyň Milli Lideri Gahryman Arkadagymyza hem-de Arkadagly Gahryman Serdarymyza alkyş sözlerini aýtdylar.
Halkara ylmy maslahat 13-nji iýunda nanotehnologiýalar, himiýa tehnologiýalary, täze materiallara barlaglary geçirmek we energetika; biotehnologiýa, molekulýar biologiýa, oba hojalygy, ekologiýa we genetika; maglumat we kommunikasion ulgamlar, kompýuter tehnologiýalary; häzirki zaman lukmançylygy we derman önümçiliginiň tehnologiýalary; innowasion ykdysadyýet; ynsanperwer ylymlary ýaly bölümçelerde dowam eder.
Wepa KANAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň VI ýyl talyby.