Saýlawlara uly ruhubelentlik bilen
2022-nji ýylyň 12-nji martynda Aşgabat şäheriniň Berkararlyk etrabynyň Türkmenistanyň Daşary işler ministrliginiň Halkara gatnaşyklary institutynda ýerleşen 2-nji saýlaw uçastogynda Türkmenistanyň Prezidentligine dalaşgärlere ses berildi. Milli saýlaw kanunçylygyna hem-de halkara hukugynyň kadalaryna laýyklykda, ýokary guramaçylyk derejede geçirilen bu möhüm jemgyýetçilik-syýasy çärä Magtymguly adyndaky Türkmen döwlet uniwersitetiniň, Türkmenistanyň Daşary işler ministrliginiň Halkara gatnaşyklary institutynyň talyplary işjeň gatnaşdylar.
Aýdym-sazlara beslenen bu syýasy çärä agzalan ýokary okuw mekdepleriniň talyplary gatnaşyp, şolardan 200-den gowragy saýlawlarda ilkinji gezek ses berýän ýaşlardyr. Olar öz konstitusion hukugyndan peýdalanyp, raýatlyk borjuny berjaý etdiler. Bu taryhy waka mynasybetli 18 ýaşy dolan ilkinji gezek ses beren talyplara institutyň Kärdeşler arkalaşygynyň ilkinji guramasy tarapyndan ýadygärlik sowgatlary gowşuryldy.
Ildeşlerimiziň ählisi agzybirlikde hem-de jebislikde, demokratik ýörelgelerinden ugur alyp, açyk we erkin ýagdaýda döwlet Baştutany wezipesine iň mynasyp dalaşgäre öz sesini berdiler. Çünki saýlawçylaryň her biriniň sesi ata Watanymyzyň bagtyýar geljegini kesgitleýän wajyp çözgütdir.
Gyzlargül ANNAGURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.