SANLY ULGAM BOÝUNÇA HYZMATDAŞLYGYŇ TÄZE UGRY

18/07/2025

2094

SANLY ULGAM BOÝUNÇA HYZMATDAŞLYGYŇ TÄZE UGRY

2025-nji ýylyň 18-nji iýulynda Türkmenistanyň ýokary hünär okuw mekdepleriniň gatnaşmaklarynda onlaýn okuw seminary geçirildi. Bu maslahaty Türkmenistanyň Bilim ministrliginiň Sanly ulgam we maglumat howpsuzlyk bölüminiň guramagynda “Coursera” kompaniýasynyň ýokary derejeli hünärmenleri tarapyndan “Türkmenistanda akademiki programmalara ýokary hilli onlaýn okuwy girizmek” atly tema boýunça geçirildi.
Seminara Türkmenistanyň ýokary we orta hünär okuw mekdepleri bilen bir hatarda, Türkmenistanyň Daşary işler ministrliginiň Halkara gatnaşyklary institutynyň hem sanly bilim, sanly ykdysadyýet we kiberhowpsuzlyk ugry boýunça jogapkär mugallymlary we hünärmenleri gatnaşdylar. Seminaryň dowamynda Türkmenistanda ýokary bilim ulgamyny döwrebaplaşdyrmak, sanly tehnologiýalaryň kömegi bilen ýokary okuw mekdepleriniň okuw programmalaryny täze derejä çykarmak we talyplara elýeterli, ýokary hilli bilim bermegiň mümkinçiliklerini giňeltmek maksady bilen geçirildi. Ýeri gelende belläp geçsek, “Coursera” dünýäniň islendik ýerinde, öňdebaryjy uniwersitetleriň we kompaniýalaryň sanly ulgam arkaly kurslaryna we derejelerine girmegi teklip edýän global onlaýn okuw platformasydyr.
Seminaryň dowamynda onlaýn bilimiň häzirki zaman tejribeleri, üstünlikli amaly modelleri we pedagogiki ýollar barada giňişleýin gürrüň edildi. Sanly ulgam arkaly guralan seminar diňleýjileriň nazary bilimleriniň kämilleşdirilmeginde, döwrebap ylmy-tehnologik tilsimleri hem-de öňdebaryjy ylmy-barlag işleriniň netijelerini özleşdirmeklerinde ähmiýetli boldy.
Aýjahan GULHANOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.