Sanly ulgam arkaly webinar geçirildi
2025-nji ýylyň 9-njy oktýabrynda Türkmenistanyň Daşary işler ministrliginiň Halkara gatnaşyklary institutynda «Gahryman Arkadagymyzyň kitaplaryndaky parahatçylyk düşünjesiniň ylmy-filosofiki teswiri» atly tema boýunça webinar geçirildi. Türkmenistanyň hemişelik Bitaraplygynyň 30 ýyllygy hem-de BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi mynasybetli, Türkmenistanyň Halkara parahatçylyk we ynanyşmak ýylynyň dowamyndaky işleriniň hem-de ugurlarynyň Konsepsiýasyna laýyklykda guralan webinara ýurdumyzyň ýokary we orta hünär okuw mekdepleriniň professor-mugallymlary, talyplary hem magistrleri gatnaşdylar.
Webinarda Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy O.Eýeberdiýewa çykyş etdi. Ol öz çykyşynda Türkmenistanyň hemişelik Bitarap döwlet hökmünde parahatçylygy pugtalandyrmaga, özara bähbitli hyzmatdaşlygy ösdürmäge, ynanyşmaga we arkalaşykly hereket etmäge gönükdirilen tagallalarynyň halkara derejede işjeň ýagdaýa eýe bolýandygy dogrusynda giňişleýin gürrüň berdi. Hakykatdan-da, türkmen halkynyň Milli Lideri Gahryman Arkadagymyzyň belleýşi ýaly, «Bitaraplygyň peýdasynda ädilen ädim biziň ýaş döwletimiziň diňe bir öz halkynyň ykbalyna däl, eýsem, Zeminiň ähli ynsanlarynyň ykballaryna-da jogapkärli çemeleşýändigini tassyklady».
«Gahryman Arkadagymyzyň kitaplaryndaky parahatçylyk düşünjesiniň ylmy-filosofiki teswiri» atly tema boýunça edilen giňişleýin çykyşyň talyp ýaşlaryň bu ugurda bilimlerini has-da çuňlaşdyrmaga ýardam etjekdigi ikuçsuzdyr.
Jahantäç GURBANGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.