Sanly ulgam arkaly geçirilen ylmy-amaly maslahat
2025-nji ýylyň 29-njy oktýabrynda Türkmenistanyň Gurluşyk we senagat toplumlarynyň işgärleriniň güni mynasybetli Türkmen döwlet binagärlik-gurluşyk institutynda sanly ulgam arkaly «Gurluşyk we senagat toplumynyň ylmy-innowasion ösüşi — bagtyýar geljegiň kepili» atly halkara ylmy-amaly maslahat geçirildi. Oňa sanly ulgam arkaly Russiýa Federasiýasynyň Tatarystan Respublikasyndan, Gyrgyz Respublikasyndan, Pakistan Yslam Respublikasyndan, Belarus Respublikasyndan, Täjigistan Respublikasyndan, Özbegistan Respublikasyndan, Gazagystan Respublikasyndan wekiller, ýurdumyzyň ýokary okuw mekdeplerinden mugallymlardyr talyplar, şeýle hem Türkmenistanyň Daşary işler ministrliginiň Halkara gatnaşyklary institutyndan mugallymlar gatnaşdylar.
Maslahatda binagärlik we gurluşyk innowasiýalary, ulag infrastrukturasynda seýismologiýanyň orny, şäher gurşawy üçin suw howdanlaryň ähmiýeti, gurluşyk önümçiligi, dizaýn işi, şähergurluşyk we ilatly ýerleriň meýilleşdirilişi, Arkadag şäheriniň binagärligi, sanly tehnologiýalaryň gurluşykda we binagärlikde ornaşdyrylmagy, bu ugurda ekologiýanyň howpsuzlygy, döwrebaplygyň we milli mirasyň sazlaşygy barada çykyş etdiler.
«Gurluşyk we senagat toplumynyň ylmy-innowasion ösüşi — bagtyýar geljegiň kepili» atly halkara ylmy-amaly maslahat öz işini degişli bölümçelerde dowam etdi.
Ogulbike YMAMBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň
Žurnalistikanyň nazaryýeti we amalyýeti kafedrasynyň mugallym-öwrenijisi.