ŞÄGIRT HALYPADAN OZDURMASA KÄR ÝITER
2022-nji ýylyň 31-nji martynda Türkmenistanyň Daşary işler ministrliginiň Halkara gatnaşyklary institutynda ýurdumyzyň ýokary okuw mekdepleriniň talyp oglanlarynyň arasynda Türkmenistanyň Bilim ministrligi, Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan yglan edilen «Şägirt halypadan ozdurmasa kär ýiter» atly döredijilik bäsleşiginiň institut tapgyry geçirildi. Gahryman Arkadagymyzyň 2021-nji ýylyň 1-nji sentýabrynda talyplar we okuwçylar bilen geçiren umumy sapagynda beýan eden türkmen halkynyň müňýyllyklardan gözbaş alyp gaýdýan milli mirasyny hem-de maddy gymmatlyklaryny gorap saklamak, olary wagyz etmek we geljekki nesillere ýetirmek, türkmen senetçiliginiň, kämil sungat derejesine öwrülen zergärçiligiň, binagärligiň, demirçiligiň, neçjarçylygyň, külalçylygyň, halk saz gurallaryny ýasamagyň, göni gaýtadan işlemegiň özboluşly usullaryny, däplerini dowam etdirmek, gaýtadan dikeltmek hem-de häzirki zaman ruhunda döwrebaplaşdyrmak baradaky atalyk öwüt-ündewlerini, gymmatly nesihatlaryny durmuşa geçirmek, şeýle hem ýaş nesli milli ruhda terbiýelemek, pederlerimiziň bize miras goýup giden sungat eserlerini kämil derejä götermek, ýaşlaryň ukyp-başarnygyny açyp görkezmek, olaryň döredijilige, el işlere, sungata bolan höweslerini has-da artdyrmak maksady bilen geçirilen bu bäsleşige her fakultetden saýlanan talyp ýigitler uly ruhubelentlik bilen gatnaşdylar. Olar milli senetçilik däplerimiz esasynda taýýarlanan zergärçilik we demir ussaçylygy, neçjarçylyk we külalçylyk ýaly önümleri ýasamak, häzirki zaman binagärlik we dizaýn maketleri ýaly ugurlar boýunça bäsleşdiler.
Çekeleşikli geçen bäsleşikde öňe saýlanan Halkara gatnaşyklary fakultetiniň talyby Batyr Esenow ýeňiji diýlip yglan edildi. Işjeň gatnaşan talyplar Hormat hatlary we ýadygärlik sowgatlar bilen sylaglanyldy.
Sona HALYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň IV ýyl talyby.