“Sagdyn milletde-sagdyn ruh” atly wagyz nesihat çäresi
2021-nji ýylyň 7-nji ýanwarynda Türkmenistanyň Daşary işler ministrliginiň Halkara gatnaşyklary institutynyň uly mejlisler zalynda Türkmenistanyň Bilim ministrliginiň Kärdeşler arkalaşyklarynyň ilkinji guramasynyň, ilkinji Zenanlar guramasynyň, Demokratik partiýasynyň ilkinji partiýa guramasynyň, Magtymguly adyndaky ilkinji Ýaşlar guramasynyň agzalarynyň gatnaşmagynda wagyz-nesihat maslahaty geçirildi. Maslahat talyp ýaşlara milli mirasymyza sarpa goýmak, zähmete söýgi döretmek, millilik, maşgala mukaddesligi, arassa ahlaklylyk, adamzat ýaşaýşyna howp salýan ýokanç keselleriň öňüni almak, jemgyýete sagdyn durmuş ýörelgelerini wagyz-nesihat etmek maksady bilen geçirildi. Wagyz-nesihat çäresiniň dowamynda çykyş edenler maslahatyň geçirilmeginiň many-mazmuny, onuň maksady barada durup geçdiler. Ýaşlaryň bagtyýar geljegini üpjün etmek, ýurdumyzda Ýaşlar baradaky döwlet syýasatyny üstünlikli durmuşa geçirmek, ýaşlaryň hukuk, ylym-bilim medeniýetini ýokarlandyrmak, ilatyň saglygyny goramak, azyk bolçulygyny üpjün etmek, sagdyn-durmuş ýörelgelerine eýermek, ýaşlaryň sporta, ylyma-bilime bolan gyzyklanmalaryny yzygiderli artdyrmak babatda ýurdumyzda alnyp barylýan işleriň ähmiýeti dogrusynda giňişleýin belläp geçdiler. Maslahatda 2020-nji ýylyň 16-njy dekabrynda geçirilen giňişleýin mejlisde ýurdumyzyň jemgyýetçilik guramalarynyň işjeň gatnaşmagynda orta, orta hünär we ýokary okuw mekdeplerinde okaýan ýaşlaryň arasynda wagyz-nesihat çärelerini geçirmek boýunça öňde goýlan wezipeleriň ýerine ýetirilişiniň ähmiýeti dogrusynda hem durup geçdiler. Maslahatyň ahyrynda oňa gatnaşyjylar halkymyzyň ýagty geljegi ugrunda bimöçber tagallalary durmuşa geçirýän Gahryman arkadagymyzyň janynyň sag, tutýan tutumly işleriniň elmydama rowaç bolmagyny arzuw etdiler.