Sagdyn-durmuş-ösüşleriň binýady.
Türkmenistanyň Daşary işler ministrliginiň Halkara gatnaşyklary institutynda talyp ýaşlaryň arasynda sagdyn durmuş we milli ahlak ýörelgelerini ýaýbaňlandyrmak, ýol hereketiniň howpsuzlygyny berjaý etmek, kanunbozulmalaryň öňüni almak maksady bilen Türkmenistanyň Içeri işler ministrliginiň, Türkmenistanyň Bilim ministrliginiň, Türkmenistanyň Saglygy goraýyş we derman senagaty ministrliginiň hem-de Türkmenistanyň Kärdeşler arkalyşygynyň Milli merkeziniň wekilleriniň gatnaşmagynda “Paýhas çeşmesi”-edep-terbiýäniň gözbaşy” atly maslahat geçirildi.
Maslahatyň dowamynda Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Gülşat Ýusupowa, Türkmensitanyň Içeri işler ministrliginiň Polisiýanyň ýol gözegçiligi müdirliginiň müdiri, polisiýanyň podpolkownigi Annadurdy Jyrykow, Türkmenistanyň Içeri işler ministrliginiň Jenaýaty agtaryş müdirliginiň 6-njy bölüminiň müdiri, polisiýanyň maýory Guwanç Weliýew, Türkmenistanyň Içeri işler ministrliginiň 4-nji müdirliginiň uly gözegçisi, polisiýanyň maýory Daýanç Durdyýew, Türkmenistanyň Döwlet edaralarynyň işgärleriniň Kärdeşler arkalaşygynyň Geňeşiniň başlygy Begenç Baýramow, Türkmenistanyň Kärdeşler arkalaşygynyň Milli merkeziniň Saglygy goraýyş işgärleriniň kärdeşler arkalaşygy boýunça utgaşdyryjysy Parahat Kakajaýew hem-de Aşgabat şäher Talyplar saglyk öýüniň lukmany Orazsoltan Aşyrowa çykyş etdiler.
Maslahatda çykyş edenler ýurdumyzda ýaş nesliň kemala gelmekleri, ýokary derejeli hünärmenler bolup ýetişmekleri babatynda uly üns berilýändigi, ýaşlaryň terbiýelemekde we olaryň sazlaşykly ösmeginde türkmençilik ýörelgelerine eýerilýändigi barada hormatly Prezidentimiziň ýurdumyzyň Garaşsyzlyk baýramynyň öňüsyrasynda türkmen halkyna sowgat beren “Garaşsyzlyk – bagtymyz” atly kitabyndan anyk mysallar arkaly gürrüň berdiler.
Şeýle-de edilen çykyşlaryň dowamynda ýurdumyzda “Saglyk” döwlet maksatnamasynyň amala aşyrylyşy, raýatlaryň arasynda ýol hereket kadalaryny hem-de howpsuzlygyny doly berjaý etmek, ýaşlaryň arasynda tertip-düzgüni saklamak, jemgyýetçilik ýerlerinde özüňi alyp barmak, zyýanly endiklere baş goşmazlyk we olaryň öňüni almak babatynda hem bellenilip geçildi.
Maslahatyň ahyrynda halkymyzy sagdyn, parahat, bolelin durmuşda ýaşamaklaryny üpjün edýän hormatly Prezidentimize çäksiz alkyş sözleri aýdyldy. Gahryman Arkadagymyzyň janynyň sag, başynyň dik, Garaşsyz, hemişelik Bitarap Türkmenistan döwletimizi mundan beýläk-de ösdürmek babatda alyp barýan ähli tutumlarynyň rowaç bolmagy arzuw edildi.
Beggeldi GUTLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara
Hukugy fakultetiniň 2-nji ýyl talyby.