Rus kinosy we animasiýa hepdeligi
2024-nji ýylyň 3-5-nji iýuny aralygynda paýtagtymyz Aşgabat şäherinde ýerleşýän “Berkarar” söwda-dynç alyş merkeziniň kinoteatrynda rus dili güni mynasybetli rus kinosy we animasiýa hepdeligi geçirilýär. Hepdelige paýtagtymyzyň ýaşaýjylardyr myhmanlary bilen bilelikde Türkmenistanyň Daşary işler ministrliginiň talyp ýaşlary hem işjeň gatnaşdylar. Hepdeligiň açylyşynda ussatlyk sapaklary, çagalar üçin dürli görnüşli ýaryşlar geçirildi. Surat zolaklary bilen guralan sergi hepdelige aýratyn öwüşgin çaýdy.
Kino muşdaklary hepdeligiň dowamynda «Aşgabat» we «Berkarar» kinoteatrlarynda rus kinorežisýorlarynyň täze işlerine, şeýle hem iň gowy animasiýa filmlerine tomaşa etmäge mümkinçilik alarlar.
Russiýa Federasiýasynyň Türkmenistandaky ilçihanasynyň metbugat gullugynyň habar bermegine görä, hepdelikde «По щучьему велению», «Я делаю шаг», «Три богатыря и Пуп Земли», «Руслан и Людмила. Больше чем сказка» ýaly filmler görkeziler.
Paýtagtymyzda rus kino hepdeliginiň guramaçylykly geçirilmegi iki dostlukly ýurduň arasyndaky medeni gatnaşyklaryň yzygiderli pugtalandyrylýandygynyň nobatdaky güwäsi bolar.
Gülçemen PARAHADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.