Ýaponiýanyň Soka uniwersiteti bilen tanyşdyryş maslahaty
2023-nji ýylyň 5-nji maýynda Türkmenistanyň Daşary işler ministrliginiň
Halkara gatnaşyklary institutynda Türkmen milli diplomatiýasynyň ýokary okuw
mekdebiniň talyplaryny Ýaponiýanyň öňdebaryjy ýokary okuw mekdebi Soka
uniwersitetinde bilim ulgamynda alnyp barylýan işleriň aýratynlygy bilen (gibrid
formatda) tanyşdyryş maslahaty geçirildi. Maslahata Halkara gatnaşyklary hem-de
D.Azady adyndaky TMDDI-niň professor-mugallymlary we ýapon dilini
öwrenýän talyplary, Ýaponiýada alyş-çalyş maksatnamasy esasynda bilim alýan
we zähmet çekýän raýatlarymyz hem onlaýn görnüşde gatnaşdylar. Maslahatyň
dowamynda oňa gatnaşyjylar Halkara žurnalistikasy hünäriniň talyplarynyň ýapon
dilinde taýýarlan «Türkmen-ýapon hyzmatdaşlygy» wideofilmine tomaşa etdiler.
Maslahatyň barşynda Türkmenistanyň Daşary işler ministrliginiň Halkara
gatnaşyklary institutynyň rektory, taryh ylymlarynyň kandidaty
J.Ş.Gurbangeldiýew 2023-nji ýylyň 25-30-njy apreli aralygynda Ýaponiýanyň
Tokio şäherine gurnalan iş saparynyň netijesi barada çykyş etdi. Şeýle-de,
maslahatyň dowamynda Ýaponiýanyň Soka uniwersitetiniň mugallymy,
Döwletmämmet Azady adyndaky türkmen milli dünýä dilleri institutynyň uçurymy
Suraý Seýidowanyň, Soka uniwersitetinde alyş-çalyş maksatnamasy esasynda
okaýan D.Azady adyndaky TMDDI-niň ýapon dili hünäriniň talyby Oguldolan
Hydyrowanyň we Türkmenistanyň Daşary işler ministrliginiň Halkara
gatnaşyklary institutynyň Halkara žurnalistikasy hünäriniň 3-nji ýyl talyby Ýulduz
Babamuradowanyň çykyşlary diňlenildi.
Duşuşygyň ahyrynda maslahata gatnaşyjylar öz aralarynda sorag-jogap
alyşdylar. Maslahata gatnaşyjylar Arkadag Serdarly bagtyýar ýaşlar ýylynda ýaşlar
boýunça halkara hyzmatdaşlygy strategiýasynyň çäklerinde Ýaponiýanyň bilim
ulgamynda gazanan tejribeleri bilen tanyşmaga we ony ýurdumyzda ornaşdyrmaga
döredýän mümkinçilikleri üçin hormatly Prezidentimize hoşallyk sözlerini beýän
etdiler.
Batyr ESENOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.