“Pederlerimiziň akyl-paýhas mirasy – ýaşlara ýörelge” atly maslahat geçirildi
2021-nji ýylyň 19-njy oktýabrynda Türkmenistanyň Daşary işler ministrliginiň Halkara gatnaşyklary institutynda “Pederlerimiziň akyl-paýhas mirasy – ýaşlara ýörelge” atly maslahat geçirildi. Bu ýokary okuw mekdebiň jemgyýetçilik guramalary tarapyndan guralan maslahata Türkmenistanyň Milli Geňeşiniň Halk Maslahatynyň, Türkmenistanyň Milli Geňeşiniň Mejlisiniň, Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň wekilleri, institutyň professor-mugallymlary we talyp ýaşlary gatnaşdylar.
Maslahatyň dowamynda institutyň okuw işleri boýunça prorektory Gülşat Ýusupowa, Türkmenistanyň Milli Geňeşiniň Halk maslahatynyň Halkara meseleler baradaky komitetiniň başlygy, Halk Maslahatynyň deputaty Mähri Bäşimowa, Türkmenistanyň Milli Geňeşiniň Mejlisiniň halkara we parlamentara aragatnaşyklar baradaky komitetiniň agzasy, Mejlisiň deputaty Aýgül Annakurbanowa, Türkmenistanyň Magtymguly adyndaky Ýaşlar gurmasynyň Merkezi Geňeşiniň Halkara hyzmatdaşlygy bölüminiň müdiri Aýşirin Orazberdiýewa çykyş edip, pederlerimizden şu güne çenli miras galan asylly ýörelgeleriň, baý milli mirasynyň häzirki we geljekki ýaşlar üçin görelde mekdebi bolup durýandygyny dürli mysallara ýüzlenip aýtdylar.
Şeýle-de çykyşlaryň dowamynda hormatly Prezidentimiziň jöwher paýhasyndan syzylyp çykan atalyk kitaplarynyň ata-babalarymyzyň ýörelgeleriniň dowamaty hökmünde ýaşlar üçin nusgalyk mekdep bolup durýandygyny aýratyn bellediler.
Aýlar ATAJYKOWA,
Türkmenistanyň Daşary işler ministrliginň
Halkara gatnaşyklary institutynyň
Halkara žurnalistikasy fakultetiniň II ýyl talyby.