PARLAMENT DIPLOMATIÝASY BOÝUNÇA HALKARA MASLAHAT GEÇIRILDI
Hormatly Prezidentimiziň parasatly baştutanlygynda ýurdumyz Bitaraplyk hukuk derejesine ygrarly bolan ata Watanymyzyň halkara derejesinde abraýy barha artýar. Türkmenistan sebitde we dünýäde parahatçylygy, howpsuzlygy pugtalandyrmak, döwletara gatnaşyklarynda hyzmatdaşlygy berkitmek babatda halkara ähmiýetli tagallalary durmuşa geçirýär.
Türkmenistan döwletimize hyzmatdaş ýurt hökmünde sebitiň we dünýäniň ýurtlary uly gyzyklanma bildirýärler. Täze taryhy döwürde parlament diplomatiýasy hil taýdan täze derejä we işjeň häsiýete eýe boldy.
Şunuň esasynda hem 2024-nji ýylyň 27-28-nji noýabrynda ýurdumyzyň gözel paýtagty Aşgabat şäherinde ýerleşýän “Ýyldyz” myhmanhanasynda “Ýewropada Howpsuzlyk we Hyzmatdaşlyk Guramasynyň çäginde parlament diplomatiýasy: Dialog – abadan we asuda geljek üçin Hyzmatdaşlygy ýola goýmagyň guraly” atly halkara maslahat geçirildi. Bu maslahata dünýäniň birnäçe ýurtlaryndan wekiller hem-de ýurdumyzyň ýokary okuw mekdepleriniň professor-mugallymlary we talyplary gatnaşdy. Maslahatda parlament diplomatiýasynyň orny, döwletara hyzmatdaşlygy saklamakda we berkitmekde dialogyň ähmiýeti hem-de abadan geljegi gurmakda ýaş nesilleriň raýdaşlygynyň ähmiýeti bilen bagly meselelere seredildi.
Türkmenistan halkara Parlament guramalary, şol sanda Parlamentara Bileleşik, ÝHHG-niň Parlamentara Assambleýasy, Garaşsyz Döwletleriň Arkalaşyklarynyň Parlamentara Assambleýasy bilen hyzmatdaşlygy işjeň ösdürýär. Soňky ýyllarda ýurdumyzda ikitaraplaýyn we köptaraplaýyn görnüşde parlamentara hyzmatdaşlygyň täze gurallary işlenilip taýýarlanyldy.
Türkmenistan oňyn Bitaraplyk, parahatsöýüjilik, hoşniýetli goňşuçylyk we özara bähbitli hyzmatdaşlyk ýörelgelerine esaslanýan daşary syýasy ugry durmuşa geçirmek bilen, parlament diplomatiýasynyň gurallaryndan netijeli peýdalanmaga uly ähmiýet berýär.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk öwreniş
kafedrasynyň w.ý.ý.,
uly mugallym.