Parahatçylyk we ynanyşmak syýasaty
2021-nji ýylyň 20-nji dekabrynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Bitaraplygynyň 26 ýyllygyna we Halkara Bitaraplyk gününe bagyşlanyp geçirilen «Parahatçylyk we ynanyşmak syýasaty — halkara howpsuzlygynyň, durnuklylygyň we ösüşiň binýady» atly halkara maslahatynyň ähmiýeti bilen bagly wagyz-nesihat çäresi geçirildi. Çärä bu ýokary okuw mekdebiniň mugallymlary we talyplary gatnaşdylar.
Maslahata gatnaşyjylar öz çykyşlarynda Türkmenistan döwletimiziň hemişelik Bitaraplyk syýasatynyň dünýäde ynsanperwerligiň, parahatsöýüjiligiň, dostlugyň belent nyşany hökmünde ykrar edilýändigi barada bellediler. Şeýle hem çykyşlarda ýurdumyzyň sebit we dünýä ähmiýetli öňe sürýän teklipleriniň goldaw tapýandygy barada nygtaldy.
Maslahatyň ahyrynda çärä gatnaşyjylar hormatly Prezidentimiziň «Ýaşasyn parahat durmuş!» atly goşgusynyň halklary parahatçylygyň, rowaçlygyň hem-de tutuş adamzadyň bagtly geljeginiň bähbidine jebisleşdirýän ýörelgeleriň mizemez ähmiýetini açyp görkezýändigini bellediler.
Mähriban GANDYMOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.