Parahatçylygyň ýaş çaparlary bilen geçirilen okuw sapagy
2022-nji ýylyň 6-njy iýunynda Türkmenistanyň Daşary işler ministrliginiň Halkara gatnaşyklary institutynda “Parahatçylygyň ýaş çaparlary” atly geçirilýän akyl-paýhas bäsleşiginiň final tapgyryna gatnaşmaga hukuk gazanan okuwçylara okuw sapagy geçirildi.
Bu okuw sapagynda institutymyzyň mugallymlary Aýjan Omarowa, Mährijemal Mämmedowa, Akmuhammet Jumagulyýew dagy Türkmenistanyň suw, ulag we energetika diplomatiýasy, olary durmuşa geçirmegiň aýratynlyklary, Gahryman Arkadagymyzyň we Hormatly Prezidentimiziň bu ugurdaky halkara başlangyçlary barada gürrüň berdiler.
Şeýle-de mugallymlar bäsleşige gatnaşyjylara döwletimiziň daşary syýasatynda ileri tutulýan ugurlary boýunça degişli maglumatlary berdiler. Okuw sapagyň dowamynda okuwçylar özlerini gyzyklandyrýan sowallaryna jogap aldylar.
Azym ÝANGIBAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.