ONLAÝN USULDA HALKARA MASLAHATY GEÇIRILDI
2022-nji ýylyň 8-nji dekabrynda Hytaý Halk Respublikasynyň Şensi welaýatynyň Bilim we medeni miras bölümleriniň we Sian şäheriniň Demirgazyk-Günbatar uniwersitetiniň Ýüpek ýolunyň arheologiýasy ulgamynda hyzmatdaşlyk boýunça ylmy-barlag merkeziniň guramagynda Ýüpek ýolunyň adaty medeniýetini aýap saklamak, ösdürmek we peýdalanmak boýunça hyzmatdaşlyk etmek babatynda onlaýn görnüşinde halkara maslahat geçirildi. Bu halkara maslahatyna 8 sany döwletden alymlar, arheologlar gatnaşdylar. Onda Türkmenistanyň Daşary işler ministrliginiň Halkara gatnaşyklary institutynyň mugallymlary hem ylmy nutuklary bilen çykyş etdiler. Jemgyýeti öwreniş ylymlary kafedrasynyň uly mugallymy Aýna Baýmuradowa “Beýik Ýüpek ýolunyň ugrundaky parfiýa şäherleri” diýen tema, şol kafedranyň uly mugallymy, taryh ylymlarynyň kandidaty Bahar Hojagulyýewa “Beýik Ýüpek ýolunyň türkmen-rus gatnaşyklaryny ösdürmekdäki ähmiýeti” atly tema, Dünýä dilleri kafedrasynyň uly mugallymy Çemen Baýriýewa “Beýik Ýüpek ýoly – medeni diplomatiýany ösdürmegiň çeşmesi” atly tema esasynda taýýarlan ylmy nutuklary bilen çykyş etdiler. Halkara maslahatyna Türkmenistanyň Ylymlar akademiýasynyň alymlary, arheologlary we beýleki ýokary okuw mekdepleriniň professor mugallymlary gatnaşdylar. Halkara maslahatyň dowamynda 50-den gowrak ylmy nutuk diňlenip, alymlar Beýik ýüpek ýolunyň ugrunda ýerleşen medeni ojaklarda geçirilýän arheologik gazuw-agtaryş işleri, türkmen we hytaý medeniýetleriniň özara baglanyşyklary, medeni diplomatiýanyň halklary ýakynlaşdyrmakdaky orny, şeýle-de gadymy we orta asyr medeni ojaklary hakynda giňişleýin, ylmy esasda gürrüň berdiler. Maslahatyň dowamynda ylmy pikir alyşmalar aýratyn ähmiýetli boldy. Halkara maslahatynyň işi üstünlikli geçdi.
Aýna BAÝMURADOWA,
Türkmenistanyň Daşary işler ministrliginiň
Halkara gatnaşyklary institutynyň
Jemgyýeti öwreniş ylymlary kafedrasynyň
uly mugallymy.