Onlaýn görnüşde geçirilen zehin bäsleşigi
2021-nji ýylyň 14-nji sentýabrynda Ýewropa Bileleşiginiň taryhyna bagyşlanyp, iňlis dilinde onlaýn görnüşde zehin bäsleşigi geçirildi.Ýewropa Bileleşiginiň Türkmenistandaky wekilhanasy tarapyndan gurnalanbäsleşige Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Döwletmämmet Azady adyndaky Türkmen milli dünýä dilleri institutynyň, Türkmenistanyň Daşary işler ministrliginiň Halkara gatnaşyklary institutynyň talyplarynyň saýlama toparlary gatnaşdylar. Bäsleşige Fransiýa Respublikasynyň Türkmenistandaky Adatdan daşary we Doly ygtyýarly Ilçisi hanym Izabel Ginel, Germaniýa Federatiw Respublikasynyň Türkmenistandaky Adatdan daşary we Doly ygtyýarly Ilçisi jenap Naýthart Hýofer-Wissing we Ýewropa Bileleşiginiň wekilleri eminlik etdiler.
Bäş tapgyrdan ybarat bolan bäsleşik sorag-jogap görnüşinde alnyp baryldy. Gyzgalaňly geçen ýaryşyň netijesinde Halkara ynsanperwer ylymlary we ösüş uniwersitetiniň talyplar topary 1-nji, Türkmenistanyň Daşary işler ministrliginiň Halkara gatnaşyklary institutynyň talyplar topary 2-nji, we Magtymguly adyndaky Türkmen döwlet uniwersitetiniň talyplar topary 3-nji orna mynasyp boldular.
Ýeňijiler gymmat bahaly sowgatlar bilen sylaglanyldy.
Akgözel RASULOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.