OKUW SAPAGY GEÇIRILDI
2026-njy ýylyň 27-nji martynda Türkmenistanyň Daşary işler ministrliginiň Halkara gatnaşyklary institutynda Türkmenistanyň diplomatiýasynyň möhüm ugurlary boýunça okuw merkeziniň we «Ýaş ykdysatçylar» ylmy gurnagynyň bilelikde guramagynda «Milli ykdysadyýetde telekeçiligiň orny» ady bilen okuw maslahaty geçirildi. Halkara ykdysady gatnaşyklary fakulteti tarapyndan guralan bu okuw maslahatyna Türkmenistanyň diplomatiýasynyň möhüm ugurlary boýunça okuw merkeziniň we «Ýaş ykdysatçylar» ylmy gurnagynyň agzalary gatnaşdylar.
Maslahatda Türkmenistanyň Magtymguly adyndaky Ýaşlar guramasynyň Merkezi Geňeşiniň Telekeçilik boýunça baş geňeşçisi, «Ygtybarly ädim» hususy kärhanasynyň esaslandyryjysy Rahymberdi Kerimow «Türkmenistanyň daşary ykdysady syýasatynda maýa goýumlaryny düzüm taýdan kämilleşdirmegiň esasy ugurlary» atly tema boýunça çykyş etdi. Şeýle-de hormatly Prezidentimiziň hususy pudagy ösdürmek babatda alyp barýan syýasatynyň üstünlikli durmuşa geçirilmegi netijesinde ýurdumyzda ýaşlaryň telekeçilige giňden çekilýändigini, işewürligi goldamak boýunça döwlet maksatnamalarynyň amala aşyrylmagyna giň mümkinçilikleriň döredilýändigini nygtap geçdi.
Duşuşyk gatnaşyjylar üçin örän täsirli bolup, olar özlerini gyzyklandyrýan sowallaryna jogap aldylar.
Hallymämmet BAÝRAMOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň 1-nji ýyl talyby.