Молодые послы ЦУР проводят тренинги
2017-nji ýylyň sentýabrynda Türkmenistanyň Daşary işler ministrliginiň Halkara gatnaşyklary institutynda Durnukly ösüş maksatlary boýunça ylmy-usulyýet merkezi Hormatly Prezidentimiziň Kararyna laýyklykda, 2030-njy ýyla çenli Durnukly ösüş maksatlarynyň Gün tertibini durmuşa geçirmek hem-de degişli ylmy-usuly işleriň alyp barylmagyny üpjün etmek maksady bilen açyldy. Merkez ilatyň arasynda, şol sanda hususy we hökümet edaralarynyň wekilleri bilen, Durnukly ösüş maksatlary we olary milli, sebit we dünýä derejesinde durmuşa geçirmek boýunça okuw sapaklaryny gurnaýar. Şeýle hem, bu ýerde Birleşen Milletler Guramasynyň Türkmenistandaky wekilhanasynyň düzüm birlikleri bilen hyzmatdaşlykda halkara hünärmenleriniň gatnaşmaklarynda okuw sapaklary hem guralýar. Merkez tarapyndan ýaşlaryň arasynda Durnukly ösüş maksatlaryny öňe sürmek boýunça tassyklanan okuw meýilnamasyna laýyklykda, 2021-nji ýylyň 21-nji ýanwarynda DÖM-iň ýaş ilçileriniň (K.Mämedow, A.Kerimow) we Aşgabat şäheriniň 21-nji ýöriteleşdirilen okuw-terbiýeçilik mekdebiniň okuwçylarynyň gatnaşmagynda okuw sapagy gurnaldy. Okuw sapagynyň dowamynda mekdep okuwçylaryna Durnukly ösüş maksatlary boýunça giňişleýin düşünje berildi, okuwçylaryň özlerini gyzyklandyrýan sowallaryna jogap berildi hem-de okuw sapagynyň netijeli bolmagyny gazanmak maksady bilen, iňlis dilinde dürli oýunlar gurnaldy.