Millilikden gözbaş alan eserler
Şu gün, 2022-nji ýylyň 28-nji ýanwarynda Türkmenistanyň Jemgyýetçilik guramalarynyň Merkezi edarasynda Türkmenistanyň Magtymguly adyndaky Ýaşlar guramasynyň Merkezi Geňeşiniň we ÝUNESKO-nyň işleri barada Türkmenistanyň Milli toparynyň Sekretariatynyň bilelikde gurnamagynda “Türkmenistan – ÝUNESKO: Parahatçylygyň, döredijiligiň we ösüşiň bähbidine hyzmatdaşlyk” atly sergi geçirildi.
Ýurdumyzyň talyp ýaşlarynyň we suratkeşleriniň, şeýle hem sungat muşdaklarynyň gatnaşmagynda gurnalan bu sergi Türkmenistanyň sungatda at gazanan işgäri, Türkmenistanyň halk suratkeşi Işanguly Işangulyýewiň hem-de onuň şägirtleriniň döreden ajaýyp eserlerine bagyşlanyp geçirildi.
Sergä gatnaşanlaryň öňünde ÝUNESKO-nyň işleri barada Türkmenistanyň Milli toparynyň jogapkär sekretary Çynar Rüstemowa, Magtymguly adyndaky Ýaşlar guramasynyň Merkezi Geňeşiniň başlygynyň orunbasary Ýazpolat Keriýew, Türkmenistanyň sungatda at gazanan işgäri, Türkmenistanyň halk suratkeşi Işanguly Işangulyýew we Türkmenistanyň Döwlet çeperçilik akademiýasynyň mugallymy Rahman Rahmanow türkmen halkynyň baý medeni we ruhy mirasyny, milli däp-dessurlarymyzy gorap saklamak, olary dünýä ýaýmak we olaryň ýaşlary watansöýüjilik ruhunda terbiýelemekdäki ähmiýeti dogrusynda çykyş etdiler.
Serginiň dowamynda halypa suratkeşiň türkmen tebigatyny, onuň däp – dessurlaryny we şöhratly taryhyny beýan edýän sungat eserlerini döredişi we olaryň tematikasyny saýlap-seçmekdäki tejribesi barada beren gyzykly gürrüňleri gatnaşyjylarda ýatdan çykmajak täsir galdyrdy. Duşuşygyň ahyrynda milli mirasymyzy ösdürmek babatynda saldamly goşan goşýan sungat işgärlerine Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan gymmatbahaly sowgatlar gowşuryldy.
Bu çäräniň dowamynda oňa gatnaşanlar türkmen halkynyň taryhy we milli mirasynyň halkara derejesini beýgeltmekde taýsyz tagallalary edýän Gahryman Arkadagymyza alkyş sözlerini aýtdylar.
Jemal REMATULLAÝEWA we Aýbölek KAKABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
4-nji ýyl talyplary