MILLI MIRASYMYZ — YNSAN EDEBINIŇ ÇEŞMESI
2021-nji ýylyň 1-nji oktýabrynda Türkmenistanyň Daşary işler ministrliginiň Halkara gatnaşyklary institutynda “Milli mirasymyz — ynsan edebiniň çeşmesi” ady bilen professor-mugallymlaryň okuw maslahaty geçirildi. Maslahata institutymyzyň professor-mugallymlary we habar beriş serişdeleriniň wekilleri gatnaşdyrlar.
Bu maslahat “Talyp ýaşlara maşgala gymmatlyklaryny düşündirmek, sagdyn durmuş ýörelgelerine eýermek hem-de tertip-düzgün kadalaryny berjaý etmek babatynda Türkmenistanyň Daşary işler ministrliginiň Halkara gatnaşyklary institutynda 2021-nji ýylyň dowamynda ýerine ýetirmeli işleriň” Meýilnamasynyň 3-nji we 4-nji bentlerine laýyklykda geçirildi. Okuw maslahatynda Magtymguly adyndaky Türkmen döwlet uniwersitetiniň Pedagogika kafedrasynyň müdiri, pedagogika ylymlarynyň kandidaty, Berkararlyk etrap Halk maslahatynyň başlygy Janabaý Şyhyýew, Halkara gatnaşyklary institutynyň Jemgyýeti öwreniş ylymlary kafedrasynyň uly mugallymy, müdiriň wezipesini wagtlaýyn ýerine ýetiriji, filosofiýa ylymlarynyň kandidaty, Ogulgurban Ezimowa çykyş etdiler. Çykyş edenler hormatly Prezidentimiziň taýsyz tagallasy netijesinde täzeçe öwüşgine eýe bolan milli mirasymyzyň, däp-dessurlarymyzyň has-da baýlaşdyrylýandygy, gadymy döwürlerden bäri ynsan kalbyna, ýüregine ruhy melhem paýlaýan egsilmez medeni mirasymyzyň, däp-dessurlarymyzyň, toý-baýramlarymyzyň milli aýratynlyklaryny beýan edýän eserler ýaşlaryň aňyna, duýgularyna, ynamyna uly täsirini ýetirýändigi, olaryň ýaşlary watançylyk, dogruçyllyk, ynsanperwerlik ýaly belent adamkärçilik sypatlarynda terbiýelenmegine uly ýardam edýändigi barada täsirli gürrüň berdiler.
Bu ugurda hormatly Prezidentimiziň 2021-nji ýylyň 1-nji sentýabrynda ýaşlaryň öňünde eden çykyşynda aýdan sözleriniň gymmatly gollanmadygy, şeýle hem ýokary halkara talaplara laýyk gelýän bilim ulgamyny döretmek, öz halkynyň ykbalyna we Watanymyzyň geljegine jogapkär, köptaraply ýaşlary terbiýelemek baradaky aladalarymyzyň watansöýüji ýaşlaryň ýetişmegini, jemgyýetiň ösüşinde ylmyň hem-de bilimiň ornunyň ýokarlanmagyny we bilimleriň hem-de hünärleriň has düýpli öwrenilmegini şertlendirýändigi baradaky çykyşlar maslahatyň özenini düzdi.
Altyn MAGTYMOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa
kafedrasynyň mugallymy.