Milli manadyň dolanyşyga girizilmeginiň 31 ýyllygyna bagyşlanan bäsleşik
2024-nji ýylyň 1-nji noýabrynda Türkmenistanyň Daşary işler ministrliginiň Halkara gatnaşyklary institutynda «Milli manadymyz – döwletimiziň berk binýady» atly döredijilik bäsleşigi geçirildi. Milli manadyň dolanyşyga girizilmeginiň 31 ýyllygy bilen baglanyşykly institutyň Halkara ykdysady gatnaşyklary fakultetiniň "Ýaş ykdysatçylar" gurnagy tarapyndan bäsleşik guraldy.
Bu bäsleşige institutyň Halkara gatnaşyklary, Halkara hukugy, Halkara ykdysady gatnaşyklary we Halkara žurnalistikasy fakultetleriniň talyplary we magistrleri gatnaşdy.
Bäsleşik 3 tapgyrdan ybarat bolup, fakultetlerden döredilen toparlar özara bäsleşdiler. I tapgyrynda toparlar özleriniň döreden walýutasy bilen bagly taýýarlan prezentasiýalaryny görkezip, çykyş etdiler. II tapgyrynda bäsleşige gatnaşyjylar dürli döwletleriň pul birliklerini we baýdaklaryny tanamak bilen wiktorinanyň soraglaryna jogap berdiler. III tapgyrynda bolsa, talyplar milli manadyň güni bilen bagly taýýarlan diwar gazetini görkezdiler.
Bäsleşigiň emin agzalarynyň gelen netijelerine görä, Halkara ykdysady gatnaşyklary fakultetiniň talyplary I orna mynasyp boldular. Ähli toparlara hormat hatlary we ýadygärlik sowgatlary gowşuryldy.
Aýgül HAÝYTOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň IV ýyl talyby.