Meýletinçiler üçin nobatdaky okuw sapagy geçirildi
2025-nji ýylyň 1-nji maýynda Türkmenistanyň Söwda we daşary ykdysady aragatnaşyklar ministrliginiň Söwda-kooperatiw mekdebinde ýurdumyzda şu ýylyň 4-8-nji awgustynda «Awaza» milli syýahatçylyk zolagynda geçiriljek Birleşen Milletler Guramasynyň Deňze çykalgasy bolmadyk ösüp barýan döwletleriň III maslahatyna bagyşlanan okuw sapagy geçirildi. Oňa bu mekdebiň meýletinçileri gatnaşdy. Okuw sapagynda Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň professory, sosiologiýa ylymlarynyň doktory Öwezdurdy Muhammetberdiýew çykyş etdi. Ol çykyşynyň dowamynda diplomatik protokol we etiket, diplomatik protokola laýyklykda özüňi alyp barmaklygyň kadalary dogrusynda giňişleýin gürrüň berdi. Okuw sapagynyň dowamynda meýletinçi talyplar özlerini gyzyklandyrýan sowallaryna jogap aldylar.
Okuw sapagy meýletinçi talyplaryň goşmaça bilim endikleriniň kämilleşmegine, diplomatik protokol we etiket boýunça düşünjeleriniň artmagyna uly goşant goşdy.
Yhlas HALLYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.