MERKEZI AZIÝA ÝURTLARYNYŇ ÝAŞLARYNYŇ DIALOGYNYŇ NOBATDAKY DUŞUŞYGY GEÇIRILDI
2026-njy ýylyň 12-nji martynda Türkmenistanyň Daşary işler ministrliginiň Halkara gatnaşyklary institutynda «Merkezi Aziýa sebitiniň ýaşlar diplomatiýasy: başlangyçlardan bilelikdäki ädimlere» diýen mowzuk astynda Merkezi Aziýa ýurtlarynyň ýaşlarynyň dialogynyň nobatdaky duşuşygy geçirildi. Çäräniň başynda Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa gutlag sözi bilen çykyş etdi.
Forumda Gazagystan Respublikasynyň Türkmenistandaky Adatdan daşary we Doly ygtyýarly ilçisi Nurlan Nogaýew, Gyrgyz Respublikasynyň Türkmenistandaky Adatdan daşary we Doly ygtyýarly ilçisi Azizbek Madmarow, Täjigistan Respublikasynyň Türkmenistandaky Adatdan daşary we Doly ygtyýarly ilçisi Wafo Niýatbekzoda hem-de Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alimow çykyş etdiler.
Mundan başga-da, duşuşygyň dowamynda Türkmenistanyň Bilim ministrliginiň Halkara bölüminiň başlygy Gülnabat Gurdowanyň we ýokarda agzalan döwletleriň wekiliýetleriniň agzalarynyň çykyşlary diňlenildi. Forumyň maksatnamasy hünär tejribesini alyşmak we sebit gün tertibiniň möhüm meseleleri boýunça ylalaşykly çemeleşmeleri işläp düzmek üçin netijeli meýdança öwrülmäge gönükdirilendir. Bu çäräniň geçirilmegi Merkezi Aziýa ýurtlarynyň ýaş diplomatlarynyň arasyndaky köptaraplaýyn hyzmatdaşlygy işjeňleşdirmek we pugtalandyrmak ýaly ileri tutulýan maksadyň durmuşa geçirilmegine gönüden-göni ýardam edýär.
Jemläp aýdanyňda, Merkezi Aziýa ýurtlarynyň ýaşlarynyň dialogynyň nobatdaky duşuşygynyň geçirilmegi açyk dialoga, hoşniýetli goňşuçylyga we özara ynanyşmak ýörelgelerine esaslanýan hünärmenleriň täze nesliniň kemala gelmegi üçin berk binýady goýýar.
Akmuhammet BERDIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 2-nji ýyl talyby.