Media topar bilen sanly ulgam arkaly okuw sapagy geçirildi
2026-njy ýylyň 20-nji ýanwarynda Türkmenistanyň Daşary işler ministrliginiň Halkara gatnaşyklary institutynda şu ýylyň 11-nji fewralynda Aşgabat şäherinde geçirilýän Türkmenistanyň «Arkadag» futbol kluby bilen Saud Arabystanynyň «Al-Nasr» toparynyň arasynda AFC-2 Çempionlar ligasynyň 1/8 finalynyň ilkinji duşuşygyny şöhlelendirmek maksady bilen ýurdumyzyň ýokary okuw mekdeplerinden gatnaşjak ýörite habarçylar (media) toparynyň ýaş wagyzçylary bilen sanly ulgam arkaly okuw sapagy geçirildi. Oňa «Garaşsyz, baky Bitarap Türkmenistan – bedew batly at-myradyň mekany» ýylynda geçiriljek köpçülikleýin sport we medeni çäreleri köpçülikleýin habar beriş serişdelerinde şöhlelendirmek maksady bilen, Türkmenistanyň Daşary işler ministrliginiň Halkara gatnaşyklary institutynyň, Нalkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň, Türkmen döwlet medeniýet institutynyň, Türkmen döwlet bedenterbiýe we sport institutynyň žurnalistika hünärinde bilim alýan zehinli talyplaryndan we halkara derejesinde geçirilen çärelere işjeň gatnaşýan, tejribeli mugallymlardan ybarat bolan habarçylar (media) toparynyň agzalary sanly ulgam arkaly gatnaşdylar.
Okuw sapagyny «Halkara gatnaşyklarda ýurdumyzyň sport diplomatiýasynyň ösüşi» atly tema boýunça Türkmenistanyň Daşary işler ministrliginiň Halkara gatnaşyklary institutynyň Talyplaryň sport klubynyň ýokary derejeli tirgenleşdiriji mugallymy Atamyrat Geldimämmedow alyp bardy. Halypa mugallym öz çykyşynda sport diplomatiýasynyň ähmiýeti barada nygtap, Garaşsyzlyk ýyllarynda ýurdumyzyň sport ulgamyndaky gazanan ösüşleri, ylaýta-da, onuň halklary dostlaşdyrmakdaky, döwletleriň we halklaryň arasynda parahatçylygy we agzybirligi syýasy nukdaýnazardan ýola goýmakdaky orny, şeýle-de türgenleri, tälimçileri we janköýerleri birek-birege ysnyşdyrýan, dost-dogan bolmaga çagyrýan, ygtybarly täsir ediji güýç hökmündäki aýratynlygy barada täsirli gürrüň berdi.
Şeýle-de okuw sapagynyň dowamynda 2026-njy ýylda geçiriljek Döwlet maksatnamasynda meýilleşdirilen çäreleri guramaçylykly şöhlelendirmek barada guralýan ýörite okuw sapaklary diňe bir çäreleriň ýokary derejede geçirilmegine däl, eýsem, medeni-ynsanperwer hyzmatdaşlygyň pugtalanmagyna, dost-doganlyk gatnaşyklarynyň ösdürilmegine-de saldamly goşant goşjakdyklaryna ynam bildirildi.
Sanly ulgam arkaly geçirilen okuw sapagynynyň ahyrynda oňa gatnaşyjylar döredilýän ähli mümkinçilikler üçin adamzady dostluga, dünýäni parahatçylyga çagyrýan Gahryman Arkadagymyza, Arkadagly Gahryman Serdarymyza alkyş sözlerini aýtdylar.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 4-nji ýyl talyby.
Bu barada şu ýerde hem okap bilersiňiz: