«MAGTYMGULY – DÜNÝÄNIŇ AKYLDARY» ATLY TÄZE KITABYŇ TANYŞDYRYLYŞ DABARASY GEÇIRILDI
2025-nji ýylyň 4-nji ýanwarynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrliginiň guramagynda hormatly Prezidentimiz Serdar Berdimuhamedowyň «Magtymguly – dünýäniň akyldary» atly täze kitabynyň tanyşdyrylyş dabarasy geçirildi. Oňa daşary ýurtlaryň Türkmenistandaky diplomatik wekilhanalarynyň ýolbaşçylary, Daşary işler ministrliginiň hünärmenleri, professor-mugallymlar we talyp ýaşlar gatnaşdylar.
Dabaranyň başynda maslahaty Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa açyp, Arkadagly Gahryman Serdarymyzyň täze eserinde beýik söz ussadynyň edebi mirasynyň, dünýä medeniýetine goşan ägirt uly goşandynyň, şahyryň ýubileýi bilen bagly geçirilen çäreleriň giňden beýan edilýändigini nygtady. Soňra Türkmenistanyň Ministrler Kabinetiniň Başlygynyň orunbasary, Daşary işler ministri Raşid Meredowyň çykyşyna uly orun berildi. Şeýle hem Gyrgyz Respublikasynyň Türkmenistandaky Adatdan daşary we Doly ygtyýarly Ilçisi Azizbek Madmarowyň, Täjigistan Respublikasynyň Türkmenistandaky Adatdan daşary we Doly ygtyýarly Ilçisi Wafo Niýatbekzodanyň, Hindistan Respublikasynyň Türkmenistandaky Adatdan daşary we Doly ygtyýarly Ilçisi hanym Madhumita Hazarika Bhagatyň, Özbegistan Respublikasynyň Türkmenistandaky Adatdan daşary we Doly ygtyýarly Ilçisi Rawşanbek Alimowyň, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň Tekstologiýa we edebi miras bölüminiň uly ylmy işgäri Gyzylgül Tagandurdyýewanyň we Türkmenistanyň Daşary işler ministrliginiň Halkara gatnaşyklary institutynyň Žurnalistikanyň nazaryýeti we amalyýeti kafedrasynyň uly mugallymy Oguloraz Eýeberdiýewanyň, Ýewropada Howpsuzlyk we hyzmatdaşlyk guramasynyň Aşgabatdaky merkeziniň ýolbaşçysy Jon MakGregoryň çykyşlary diňlenildi.
Çykyş edenler akyldar şahyryň döredijilik mirasynyň dünýä medeniýetiniň hazynasynyň aýrylmaz bölegidigini nygtamak bilen, şahyra bagyşlanyp ýazylan «Magtymguly – dünýäniň akyldary» atly täze kitabyň tutuş türkmen halkyna, şol sanda doganlyk halklara Täze ýylyň bosagasynda örän uly sowgat bolandygyny aýtdylar.
Dabaranyň ahyrynda «Magtymguly – dünýäniň akyldary» atly täze kitabyň tanyşdyrylyş dabarasyna gatnaşyjylaryň adyndan Türkmenistanyň hormatly Prezidenti Serdar Berdimuhamedowa Ýüzlenme kabul edildi.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
III ýyl talyby.
Şeýle hem şu ýerde okap bilersiňiz: