Energetika boýunça okuw maslahaty geçirildi
2024-nji ýylyň 29-njy aprelinde Türkmenistanyň Daşary işler ministrliginiň Halkara gatnaşyklary institutynda Birleşen Milletler Guramasynyň Ösüş maksatnamasynyň we Ýewropa Bileleşiginiň gurnamagynda “Durnukly energetika, energiýa netijelilik we dikeldilýän energiýanyň ösüşi” atly tema bagyşlanan okuw maslahaty geçirildi.
Geçirilen okuw maslahatynyň dowamynda SECCA (Sustainable Energy Connectivity in Central Asia) taslamasynyň wekilleri - halkara derejeli konsultant Agris Kamenders we halkara derejeli konsultant Nikolaus Zakaria, şeýle hem Türkmenistanyň Döwlet energetika institutynyň “Energiýanyň dikeldilýän çeşmeleri” ylmy-önümçilik merkeziniň direktory, tehniki ylymlaryň kandidaty Kakageldi Saryýew we “Energiýanyň dikeldilýän çeşmeleri” ylmy-önümçilik merkeziniň uly ylmy işgäri Nurmuhammet Allanazarow dünýäde energetiki kompaniýalaryň orny, energetikanyň dünýädäki tejribesi we möhüm meseleleri barada gyzykly gürrüň berdiler.
Duşuşygyň ahyrynda talyplar energetika temasynda özlerini gyzyklandyrýan soraglary berdiler.
Şeýle okuw maslahatlarynyň geçirilmegi talyp ýaşlaryň dünýädäki möhüm meseleler boýunça gözýetimini giňeldip, düşünjelerini artdyrmaga, bu meseleler boýunça özleriniň pikirlerini beýan etmäge ýardam edýär.
Şamyrat AŞYRMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.