Kitabyň ýapon dilindäki neşiri
2024-nji ýylyň 18-nji dekabrynda Türkmenistanyň Daşary işler ministrliginiň Halkara gatnaşyklary institutynda hormatly Prezidentimiz Serdar Berdimuhamedowyň «Ýaşlar — Watanyň daýanjy» atly kitabynyň ýapon diline terjime edilen neşiriniň tanyşdyrylyş dabarasy geçirildi. Tanyşdyrylyş dabarasyna daşary döwletleriň we halkara guramalaryň ýurdumyzdaky diplomatik wekilhanalarynyň, ýurdumyzyň daşary ýurtlardaky diplomatik wekilhanalarynyň wekilleri, daşary işler ministrliginiň işgärleri, halypa diplomatlar, professor-mugallymlar, talyp ýaşlar gatnaşdylar.
Dabarada Ýaponiýanyň Türkmenistandaky Adatdan daşary we Doly ygtyýarly ilçisi Hiroshi Sasaki, «ITOCHU Corporation» kompaniýasynyň direktorlar geňeşiniň agzasy, ýerine ýetiriji wise-prezidenti, maşyn we enjamlar kompaniýasynyň prezidenti, Ykdysady hyzmatdaşlyk boýunça ýapon-türkmen komitetiniň başlygy Hiroýuki Subaý, Türkmenistanyň Ýaponiýa döwletindäki Adatdan daşary we Doly ygtyýarly ilçisi Atadurdy Baýramow, Türkmenistanyň Daşary işler ministrliginiň Halkara gatnaşyklary institutynyň rektory Gülşat Ýusupowa, Türkmenistanyň Oguz han adyndaky Inžener-tehnologiýalar uniwersitetiniň tehniki ugurlar boýunça daşary ýurt dilleri kafedrasynyň ýapon dili mugallymy Maýsa Tuwakbaýewa, Türkmenistanyň Daşary işler ministrliginiň Halkara gatnaşyklary institutynyň Dünýä dilleri kafedrasynyň ýapon dili mugallymy Dünýägözel Babahanowa dagy çykyş etdiler. Söz sözlänler hormatly Prezidentimiziň ýaşlara bagyşlap döreden ilkinji eseriniň gadyr-gymmaty, çeperçiligi, ýaş nesli watansöýüjilik ruhunda terbiýelemekdäki ähmiýeti dogrusynda gymmatly pikirleri aýtdylar.
Türkmen-ýapon gatnaşyklary barada belläp geçsek, ýurtlarymyzyň arasynda ençeme ýyllardan bäri dostlukly gatnaşyklar alnyp barylyp, medeniýet hepdelikleri, dürli hili çäreler giň gerime eýe bolýar. Şeýle çäreleriň geçirilmegi Gahryman Arkadagymyzyň, Arkadagly Gahryman Serdarymyzyň halkara derejesindäki medeni-diplomatik gatnaşyklara uly üns berýändiginden nyşan bolup, bu ugurda ýene-de birnäçe işleriň durmuşa geçiriljekdiginden habar berýär. Ýeri gelende bellesek, 16-njy dekabrda hormatly Prezidentimiz Serdar Berdimuhamedow «ITOCHU Corporation» kompaniýasynyň direktorlar geňeşiniň agzasy, ýerine ýetiriji wise-prezident, maşyn we enjamlar kompaniýasynyň prezidenti, Ykdysady hyzmatdaşlyk boýunça ýapon-türkmen komitetiniň başlygy Hiroýuki Subaýy kabul etmegi ikitaraplaýyn gatnaşyklaryň ösdürilmeginde netijeli häsiýete eýe boldy. Myhman wagt tapyp kabul edendigi üçin hormatly Prezidentimize hoşallyk bildirip, ýurtlarymyzyň arasyndaky dürli ugurlary öz içine alýan hyzmatdaşlyklary ösdürmekde alyp baran işleri üçin türkmen halkynyň Milli Liderine iň gowy arzuwlaryny beýan etdi. Şeýle-de, myhmanyň şu gezekki saparynyň çäklerinde geçiriljek Ykdysady hyzmatdaşlyk boýunça türkmen-ýapon komitetiniň 15-nji mejlisiniň uly ähmiýete eýedigi barada aýdylyp geçildi. Şeýle hem Türkmenistanyň Aziýa — Ýuwaş umman sebitinde ýerleşýän Ýaponiýa döwleti bilen alnyp barylýan gatnaşyklaryň ösdürilmegine aýratyn ähmiýet berýändigi bellenilip geçildi. «Merkezi Aziýa — Ýaponiýa» dialogynyň çäklerinde-de syýasy-diplomatik, söwda-ykdysady, medeni-ynsanperwer ugurlara aýratyn üns berildi. Kitabyň ýapon diline terjime edilmegi hem şeýle gatnaşyklaryň pugtalanýandygynyň anyk mysaly bolandygyny bellemelidiris. Munuň özi dostlukly ýurduň ýaşlarynyň hem hormatly Prezidentimiziň eseri bilen giňden tanyşmagyna ýardam eder. Çykyşlar şowhunly elçarpyşmalar bilen garşylanyp, dabaranyň ahyrynda Gahryman Arkadagymyza, Arkadagly Gahryman Serdarymyza döredip berýän mümkinçilikleri üçin hoşallyk sözleri aýdyldy.
Baýnazar BAÝHANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara
žurnalistikasy fakultetiniň I ýyl talyby.
Bu barada şu ýerde hem okap bilersiňiz: