«KÄMILLEŞMEK NÄME ÜÇIN GEREK?» ATLY OKUW SAPAGY
2026-njy ýylyň 13-nji aprelinde Türkmenistanyň Daşary işler ministrliginiň Halkara gatnaşyklary institutynda ýaşlaryň ruhy-ahlak terbiýesini we şahsyýet hökmünde kämilleşmegini maksat edinýän «Kämilleşmek näme üçin gerek?» atly okuw sapagy geçirildi. Ony «Gujurly nesil» bilim merkeziniň maslahatçysy, tejribeli pedagog Sylap Ataýew alyp bardy.
Okuw sapagynda Sylap Ataýew häzirki zaman jemgyýetinde kitabyň tutýan orny, onuň ynsanyň kämilleşmegindäki ähmiýeti barada giňişleýin durup geçdi. Ol öz çykyşynda kitabyň diňe bir bilim çeşmesi bolman, eýsem adamyň içki dünýäsini baýlaşdyrýan, pikirlenmek ukybyny ösdürýän we durmuş ýolunda dogry ugur görkezýän guraldygyny belledi. Bilermen geljekki nesilleriň terbiýesinde maşgalanyň we kitabyň sazlaşygynyň ähmiýeti barada gyzykly maglumatlary paýlaşdy. Ýaşlarda okamaga bolan söýgini kämilleşdirmegiň usullaryny giňişleýin beýan etdi.
Talyplar okuw sapagynyň dowamynda özlerini gyzyklandyrýan soraglar bilen hünärmene ýüzlendiler we döwrebap terbiýeçilik usullary barada gymmatly maslahatlary aldylar.
Selbi BABAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.