IKITARAPLAÝYN GATNAŞYKLAR HAS-DA BERKEÝÄR
2025-nji ýylyň 11-nji oktýabrynda Türkmenistanyň Daşary işler ministrliginiň Halkara gatnaşyklary institutynda Gruziýanyň Suhumi döwlet uniwersitetiniň rektory Tea Jugeliniň we institutymyzyň rektory Gülşat Ýusupowanyň arasynda ikitaraplaýyn duşuşyk geçirildi. Bu duşuşyk 2025-nji ýylyň 10 − 12-nji oktýabry aralygynda Aşgabatda geçirilýän «Saglygy goraýyş, bilim we sport Berkarar döwletiň täze eýýamynyň Galkynyşy döwründe» atly halkara ylmy maslahatyň we serginiň çäklerinde geçirildi.
Onuň dowamynda taraplar ýokary okuw mekdepleriniň we akademiki toparlaryň arasyndaky hyzmatdaşlygyň berkemegine ýardam etjek başlangyçlara üns berdiler. Rektor Tea Jugeli bilelikdäki akademiki we medeni taslamalary ösdürmek boýunça başlangyçlary işjeň goldamaga taýýardygyny aýdyp, ýokary okuw mekdepleriniň arasynda gatnaşyklaryň giňeldilmeginiň Türkmenistan bilen Gruziýanyň arasyndaky hyzmatdaşlygy berkitjekdigini belledi.
Duşuşyk tamamlanandan soňra, hormatly myhmanyň gatnaşmagynda talyp ýaşlar üçin okuw sapagy guraldy. Myhman türkmen-gruzin gatnaşyklarynyň ýylsaýyn geriminiň giňemegi, hyzmatdaşlygyň häzirki ýagdaýy we geljegi, ikitaraplaýyn hem-de köptaraplaýyn gatnaşyklary ösdürmekde durmuşa geçirilýän işler barada gürrüň berdi. Şeýle-de, Türkmenistanyň we Gruziýanyň arasyndaky syýasy, söwda-ykdysady, ulag-aragatnaşyk, ylym-bilim, medeni-ynsanperwer ugurlarda gatnaşyklary mundan beýläk hem ösdürmek üçin uly mümkinçilikleriň bardygyna ünsi çekip, muňa mysal hökmünde türkmen-gruzin söwda dolanyşygynyň ýylba-ýyldan artýandygyny nygtady. Türkmenistanyň Gruziýa bilen özara bähbitli hyzmatdaşlygynyň netijeli häsiýete eýedigini belläp, ulag-aragatnaşyk ulgamynda «Lapis Lazuli» adyny alan Owganystan — Türkmenistan — Azerbaýjan — Gruziýa — Türkiýe ulag-üstaşyr geçelgesiniň ähmiýeti dogrusynda giňişleýin gürrüň berdi.
Täsirli geçen duşuşygyň ahyrynda rektor Tea Jugeli talyplaryň türkmen-gruzin gatnaşyklary hakda beren sowallaryna giňişleýin we takyk jogap berdi.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.