HÜNÄR EÝESINI EZIZ EDER
Türkmenistanyň Daşary işler ministrliginiň Halkara gatnaşyklary institutynda Türkmenistanyň Milli Bilim instituty tarapyndan ýokary okuw mekdepleriniň professor-mugallymlary üçin 2022-nji ýylyň 29-30-na aralygynda “Ýokary bilimiň pedagogikasynyň we psihologiýasynyň meseleleri” atly usuly-amaly okuwlary üstünlikli geçirildi. “Halkyň Arkadagly zamanasy” ýylynda 2022-2023 –nji okuw ýylynyň öňsyrasynda gurnalan usuly-amaly okuwlarynyň baş maksady Berkarar döwletiň täze eýýamynyň Galkynyşy döwründe Türkmenistanyň hormatly Prezidentiniň milli bilim ulgamyny döwrebaplaşdyrmak ugrunda alnyp barylýan giň göwrümli işleriň ähmiýetini düşündirmek öňde goýlan aýdyň maksatlary durmuşa geçirmekde pedagogikanyň we psihologiýanyň esaslary barada, okuw işlerini gurnamagyň görnüşleri, talyplaryň bilimini barlamagyň, baha bermegiň usullary, terbiýäniň many-mazmuny, edep-terbiýe bermegiň usullary, we usulyýet tärleri barada pikir alşyldy. Türkmenistanyň Milli Bilim institutynyň bölüm müdiri, fizika-matematika ylymlarynyň kandidaty, dosent Baýmämmet Pirnyýazow Türkmenistanyň Prezidentiniň 2017-nji ýylyň 15-nji sentýabrynda çykaran 340-nji karary bilen tassyklanan “Türkmenistanda sanly bilim ulgamyny ösdürmegiň Konsepsiýasy”, sanly bilimiň didaktika meseleleri barada giňişleýin gürrüň berdi. Bilimiň sanlaşdyrylýan şertlerinde pedagog sanly giňişlikde ähli esasy hünär endikleri ýüze çykarmagy başarmaly. Bu gurşawda pedagog öz dersi boýunça materialy işläp düzmegi, goşmaça maglumaty tapmagy, talyplara öwredilýän materialy gyzykly we ýeňil beýan etmegi, ene-ata we okuwçy bilen özara gatnaşygy ýola goýmagy, çagalaryň ösüş dinamikasyny gözegçilikde saklamagy, özbaşdak kämilleşmegi we sanawda beýan edilenleri özi hem-de okuwçy üçin howpsuz amala aşyrmaly. Gün-günden pedagogyň sanlylaşan serişdeleriniň gerimi giňelip, olar boýunça pedagoga we bilim edarasynyň ýolbaşçylar toparyna işleri düzgünleşdirmek üçin häzirki zaman hyzmatlaryň klassifikasiýasyny saýlamak zerur. Pedagogika ylymlarynyň kandidaty, dosent Gündogdy Şadurdyýew Berkarar döwletiň täze eýýamynyň Galkynşy döwründe bilim ulgamynda zähmet çekýän pedagogik işgärleriniň öňünde durýan wezipeler we olary amal etmegiň usullary we usulyýet tärleriniň aýratyn reproduktiw usuldan konstruktiw usula geçmek, ozalky bar bolan usullary özgertmek zerur bolup durýanlygy barada, şeýle hem adam aňynyň inženeri bolan mugallym, talybyň başarnygyny dogry akaba ugrukdyrmagy, halypa şägirt gatnaşyklary barada giňişleýin gürrüň berdi we sorag-jogap alşyldy.
Hormatly Prezidentimiz türkmen halkynyň taryhy-medeni gymmatlyklaryny, asylly däp-dessurlaryny, ruhy-ahlak ýörelgelerini öwrenmek we saklamak boýunça wajyp wezipeleri öňde goýup, bu barada: “Ösüp gelýän nesillerimize ata-babalarymyzyň öwüt-ündewleriniň esasynda bilim we terbiýe berlişini has-da kämilleşdirmek milli bilim ulgamynyň wajyp wezipesi bolup durýar. Şoňa görä-de, bilim özgertmelerini has-da işjeňleşdirmek, bu işiň döwrüň talaplaryna we halkara standartlara laýyklygyny üpjün etmek, mugallymlaryň hünär ussatlyklaryny, okatmagyň usullaryny nazaryýet we tejribe taýdan kämilleşdirmek babatdaky işler utgaşdyrylyp dowam etdiriler” diýen ajaýyp sözleri täze okuw ýylyňda bilim ulgamynda zähmet çekýän her bir işgäriň, aýratyn-da mugallymlaryň hünär kämillikligine ýetmegi ruhlandyrar.
Täze 2022-2023-nji okuw ýyly bilen ähli bilim işgärlerini gutlaýarys!
Gahryman Arkadagymyza, hormatly Prezidentimize berk jan saglyk, uzak ömür, tutumly işleriniň rowaç bolmagyny, belent başlarynyň aman bolmagyny arzuw edýäris!
Gülşat ÝUSUPOWA,
Türkmenistanyň Daşary işler ministrliginiň
Halkara gatnaşyklary institutynyň
okuw işleri boýunça prorektory.
Bu barada şu ýerde hem okap bilersiňiz: