HALYPA DIPLOMATYŇ GATNAŞMAGYNDA AÇYK SAPAGY GEÇIRILDI
2025-nji ýylyň 9-njy dekabrynda Türkmenistanyň Daşary işler ministrliginiň Halkara gatnaşyklary institutynda 2025-nji ýylyň “Halkara parahatçylyk we ynanyşmak ýyly” diýlip yglan edilmegi hem-de Türkmenistanyň hemişelik Bitaraplygynyň şanly 30 ýyllygy mynasybetli, şeýle-de Türkmenistanyň Halkara parahatçylyk we ynanyşmak ýylynyň dowamyndaky işleriniň we ileri tutýan ugurlarynyň Konsepsiýasyna laýyklykda göni wideoaragatnaşyk arkaly açyk sapak geçirildi. Sapakda Türkmenistanyň Daşary işler ministrliginiň Halkara gatnaşyklary institutynyň Strategik barlaglar boýunça ylmy merkeziniň başlygy, Türkmenistanyň Adatdan daşary we Doly ygtyýarly Ilçisi Şiri Şirýew “Iri döwletleriň geosyýasy oýunlarda ulanýan usullary” atly tema bilen çykyş etdi. Göni wideoaragatnaşyk arkaly geçirilen açyk sapaga ýurdumyzyň ähli ýokary okuw mekdeplerinden professor-mugallymlar we talyp ýaşlar gatnaşdylar.
Halypa diplomat geosyýasy çäklerde bolup geçýän ýagdaýlary öwrenmegiň we olara baha bermegiň, çaklamalary öňe sürmegiň we degişli teklipler esasynda uzak möhletleýin maksatnamalary işläp düzmegiň daşary syýasatda we diplomatiýada strategiki ähmiýetli çäreleri durmuşa geçirmäge mümkinçilik berýändigi barada gürrüň berdi.
Sapagyň ahyrynda halypa diplomat Arkadagly Gahryman Serdarymyzyň çuňňur paýhasy, başarnykly döwlet syýasaty we tutanýerli işleri netijesinde ösüşiň we bagtyýarlygyň ak ýoly bilen barha öňe tarap barýan Türkmenistanyň bu gün dünýäde abraýly we uly hormat goýulýan döwlet hökmünde giňden tanalýandygyny hem-de Bitaraplyk, parahatçylyksöýüjilik, deňhukuklylyk we özara bähbitlere hormat goýmaklyk, öz üstüne alan halkara-hukuk borçlaryna gyşarnyksyz eýermeklik ýaly ýörelgeleriň Türkmenistanyň daşary syýasatynyň we diplomatiýasynyň esasy ugurlary bolup durýandygyny belledi.
Şyhdurdy ŞYHYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň 3-nji ýyl talyby.