Halypa diplomatyň belent sarpasy
2024-nji ýylyň 4-nji maýynda Türkmenistanyň Daşary işler ministrliginiň Halkara gatnaşyklary institutynda Türkmenistanyň Gahrymany, Türkmenistanyň ussat diplomaty, Türkmenistanyň Adatdan daşary we Doly ygtyýarly Ilçisi, Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) işleri barada Türkmenistanyň milli toparynyň jogapkär sekretary Çynar Rustemowanyň 70 ýaş ýubileý toýy mynasybetli dabara geçirildi. Bu dabara Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow, Türkmenistanyň Halk Maslahatynyň Diwanynyň iş dolandyryjysynyň w.w.ý.ý., Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýerine ýetiriji direktory Rejep Bazarow, ýurdumyzyň diplomatik gullugynyň işgärleri, ýokary okuw mekdebimiziň professor-mugallymlary hem-de talyp ýaşlary gatnaşdylar.
Dabaranyň dowamynda çykyş edenler ilki bilen, Çynar Rustemowany 70 ýaş ýubileý toýy bilen gutladylar. Halypa diplomata hormatly Prezidentimiziň, Türkmenistanyň Halk Maslahatynyň Başlygy Gahryman Arkadagymyzyň, Türkmenistanyň Daşary işler ministrliginiň, Türkmenistanyň Daşary işler ministrliginiň Halkara gatnaşyklary institutynyň adyndan gymmat bahaly sowgatlar gowşuryldy.
Dabarada çykyş edenler Türkmenistanyň Gahrymany, Türkmenistanyň ussat diplomaty, Türkmenistanyň Adatdan daşary we Doly ygtyýarly Ilçisi Çynar Rustemowanyň köp ýyllaryň dowamynda ýurdumyzyň daşary syýasatyny durmuşa geçirmekde uly işleri bitirip gelýändigini nygtadylar. Bu hakynda Gahryman Arkadagymyzyň we hormatly Prezidentimiziň iberen Gutlagynda hem aýratyn bellenilýär. Halypa diplomat häzirki wagtda hem Türkmenistan bilen ÝUNESKO-nyň arasynda gatnaşyklary kämilleşdirmekde, döwletimiziň çäginde ÝUNESKO kafedralaryny, klublaryny açmakda we bu guramanyň ideýalaryny geljekki türkmen diplomatlarynyň arasynda giňden wagyz-nesihat etmekde irginsiz zähmet çekýär.
Şeýle-de çykyşlarda Türkmenistanyň Gahrymany Çynar Rustemowa Türkmenistanyň Daşary işler ministrliginiň Halkara gatnaşyklary institutynda zähmet çeken döwründe hem köp ýyllaryň dowamynda gazanan iş tejribesini talyplar bilen paýlaşyp, olaryň kämil diplomatlar bolup ýetişmeginde ýakyndan ýardam berendigi barada uly buýsanç bilen bellenildi.
Dabaranyň ahyrynda oňa gatnaşyjylar hormatly Prezidentimiziň baştutanlygynda ýurdumyzyň parahatçylyga, döredijilige, ösüşe gönükdirilen içeri we daşary syýasatyny, halkara ähmiýetli taslamalaryny, düýpli özgertmelerini durmuşa geçirmekde, Türkmenistan – ÝUNESKO hyzmatdaşlygyny berkitmekde Türkmenistanyň Gahrymany, Türkmenistanyň ussat diplomaty, Türkmenistanyň Adatdan daşary we Doly ygtyýarly Ilçisi, Birleşen Milletler Guramasynyň Bilim, ylym we medeniýet boýunça guramasynyň (ÝUNESKO) işleri barada Türkmenistanyň milli toparynyň jogapkär sekretary Çynar Rustemowa alyp barýan işlerinde uly üstünlikleri arzuw etdiler.
Gurbansähet GURBANSÄHEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 3-nji ýyl talyby.
Şeýle hem bu barada şu ýerden
okap bilersiňiz: