Halypa diplomatymyz bilen geçirilen okuw sapagy
2023-nji ýylyň 22-nji fewralynda Türkmenistanyň Daşary işler ministrliginiň Halkara gatnaşyklary institutynda ýörite okuw sapagy geçirildi. Milli diplomatiýanyň ýokary okuw mekdebiniň Halkara gatnaşyklary we diplomatiýa kafedrasynyň müdiri, filosofiýa ylymlarynyň kandidaty, taryh ylymlarynyň doktory, professor, Türkmenistanyň ussat diplomaty, Adatdan daşary we Doly ygtyýarly Ilçi A.Rahmanowyň alyp baran sapagyna institutymyzyň talyp ýaşlary gatnaşdylar.
Sapakda A.Rahmanow talyp ýaşlara diplomatiýanyň we halkara gatnaşyklarynyň aýratynlyklary, diplomatlara bildirilýän talaplar, şeýle hem Watanymyzy ösdürmekde olaryň eýeleýän wajyp orny barada giňişleýin gürrüň berdi, öz gazanan durmuş tejribelerini paýlaşdy. Hususan-da, halypa diplomatymyzyň ömür ýoly barada institutymyzyň okuw studiýasy tarapyndan taýýarlanylan ýörite wideo ýazgysynyň görkezilmegi okuw sapagyna gatnaşyjylarda uly täsir galdyrdy.
Sapagyň barşy halypa diplomat bilen talyplaryň özara sorag-jogap alyşmalary bilen utgaşdy.
Arslan SYÝAHATOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň II ýyl talyby.