HALYPA DIPLOMAT BILEN OKUW SAPAGY GEÇIRILDI
2026-njy ýylyň 4-nji martynda Türkmenistanyň Daşary işler ministrliginiň Halkara gatnaşyklary institutynda halyp diplomatyň gatnaşmagynda “At deý ýyndamlykda öňe barýansyň, bedew – şan-şöhratyň, Garaşsyz Watan” atly 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi mynasybetli okuw sapagy geçirildi. Ony Halkara gatnaşyklary we diplomatiýa kafedrasynyň uly mugallymy, Türkmenistanyň Adatdan daşary we Doly ygtyýarly ilçisi Nurberdi Amanmyradow alyp bardy.
Okuw sapagynda halypa diplomat talyp ýaşlara hemişelik Bitarap Türkmenistanyň Garaşsyzlygynyň şanly 35 ýylynyň dowamynda daşary syýasatynda, ykdysadyýetinde, ylym-bilim ulgamynda we beýleki pudaklarda ýeten ajaýyp sepgitleri barada giňişleýin gürrüň berdi. Şol sanda 2026-njy ýylyň şygarynyň türkmen bedewleri bilen baglanyşyklydygyny belläp, olaryň türkmen halkynyň milli buýsanjydygyny, maddy medeni mirasyň halkymyz tarapyndan köp asyrlaryň dowamynda ösdürilip ýetişdirilen we kämilleşdirilen ajaýyp nusgasydygyny nygtady.
Sapagyň ahyrynda talyplar halypa diplomata beren gyzykly gürrüňleri üçin köp sagbolsun aýtdylar we özlerini gyzyklandyrýan soraglaryny berdiler. Şeýle sapaklaryň yzygiderli geçirilmegi ýaş hünärmenleriň bilimini we tejribesini artdyrmaga uly mümkinçilikleri döredýär.
Rahym AKMURADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary we diplomatiýa kafedrasynyň mugallymy.